Suriyada terrorçular rus komandanlığı ilə gizli görüşüb
Türkiyənin noyabrın 19-da başlatdığı “Pəncə-Qılınc” əməliyyatından səkkiz gün keçir. Bir həftədən çoxdur ki, Suriya və İraqın şimalındakı terrorçular havadan bombalanır. Son açıqlamaya görə, döyüş təyyarələri və pilotsuz uçuş aparatlarının iştirak etdiyi əməliyyatda 326 terrorçu məhv edilib.
"Şərq" Türkiyə mətbuatına istinadən xəbər verir ki, Suriyanın şimalında qoşunları olan ABŞ və Rusiya Ankaranın dayanmasını tələb edir. Lakin Türkiyə lideri Rəcəb Tayyib Ərdoğan quru əməliyyatlarının siqnalını verir. Konyada çıxış edən Ərdoğan, "Türkiyə öz təhlükəsizliyini təmin etmək üçün sərhədləri daxilində və xaricində hər cür ixtiyar sahibibir. Bu hüququ istifadə etməyimizə heç kim mane ola bilməz" deyib. Ankaranın qətiyyətli mövqeyi YPG terrorçuları arasında çaxnaşmanı artırıb. ABŞ çətirinə güvənən, lakin yenidən məyus olan terror tərəfdarları həftə sonu Qamışlıda, Mardin Nusaybində nümayiş keçiriblər. Aksiyalardan sonra terrorçularla ruslar arasında görüş keçirilib. Qamışlının bağlı olduğu Hasekedə Suriyadakı rus qoşunlarının komandanı Aleksandr Çayko ilə YPG terror qruplaşmasının lideri Mazlum Abdi arasında gizli təmas baş tutub. Terrorçu lider Abdi ABŞ Prezidenti Co Baydendən kömək istədiyini, Vaşinqtonun verdiyi vədlərə əməl etmədiyini söyləyib. Abdi-Çayko görüşündə Türkiyənin mümkün quru əməliyyatı müzakirə olunub. Xəbərə görə, rus komandir Suriya ordusu birliklərinin Türkiyə sərhədinə yerləşdirilməsini bir daha gündəmə gətirib. Görüşdə Türkiyənin mümkün əməliyyatına qarşı görüləcək tədbirlərin gündəmdə olduğunu bildirən Mazlum Abdinin sözlərinə görə, Suriya əsgərlərinin yerləşdiriləcəyi xətt Türkiyə sərhədinin 30 kilometrliyində ola bilər. Moskva Ankaranı təmkinli olmağa çağırır. Prezident Vladimir Putinin Suriya üzrə xüsusi nümayəndəsi Aleksandr Lavrentyev ötən həftə verdiyi açıqlamada Türkiyə və Suriyanın bir-birinə qarşı addımlar atmağa açıq olduğuna dair işarələr gördüyünü bildirib. Suriyanın şimalında 900-ə yaxın əsgəri olan ABŞ da Türkiyəni hədəf alan açıqlamalar verməkdədir. Pentaqon türk təyyarələrinin bombardmanının birbaşa ABŞ əsgərlərini təhdid etdiyini bildirir.
