Sumqayıtda bir neçə gün əvvəl yanğın baş verən "Karvan” Ticarət Mərkəzində bədbəxt hadisə olub. Sumqayıt şəhər Polis İdarəsindən APA-ya verilən məlumata görə, ticarət mərkəzində təmir işlərində çalışan, 35 yaşlı Ramil Rafiq oğlu Hüseynovun üstünə beton piltə düşüb. Nəticədə o, aldığı xəsarətdən dünyasını dəyişib. Faktla bağlı araşdırma aparılır.
Qeyd edək ki, oktyabrın 19-da Sumqayıtdakı "Karvan” Ticarət Mərkəzində güclü yanğın olub. Yanğın nəticəsində ümumi sahəsi təxminən 35000-40000 kv.m olan ticarət kompleksinin ərazisində yerləşən 2-3 (bir hissəsi 2, digər hissəsi 3 mərtəbədən ibarət) mərtəbəli "Karvan” ticarət mərkəzinin 2-ci mərtəbəsinin yanar konstruksiyaları təxminən 20000 kv.m sahədə, 1-ci mərtəbəsinin yanar konstruksiyaları 2500 kv.m sahədə və 3-cü mərtəbəsinin yanar konstruksiyaları 1200 kv.m sahədə (ümumi təxminən 23700 kv.m) yanıb.
Xilasedicilər tüstüdən zəhərlənmiş 16 nəfər vətəndaşı hadisə yerinə cəlb olunmuş Təcili Tibbi Yardım Stansiyasının həkimlərinə təhvil veriblər.
