"Son bir həftədə üç ailə xəstə uşağından imtina edib. Artıq belələrinini sayı o qədər artıb ki, onları yerləşdirməkdə çətinlik çəkirik”. Bunu virtualaz.org saytına Autizm Defektoloji və Psixoloji Yardım Mərkəzi İctimai Birliyinin sədri Çiçək Məmmədli bildirib.
Onun sözlərinə görə, rəhbərlik etdiyi mərkəzə dünən iki uşaq gətirilib: "Uşaqlar bacı-qardaşdır. Qızın 7, oğlanın isə 6 yaşı var. Uşaqların atası narkotik istifadəçisi olduğundan ailəni tərk edib. Anası isə iki azyaşlını tək buraxıb işləyir. Uşaqlar nəzarətdən kənarda qaldığından onlarda əqli gerilik əmələ gəlib”.
Ç.Məmmədli deyir ki, uşaqların küçədə ac-susuz qalması nəticəsində balacalar sətəlcəm olub: "Valideynlər uşaqlarınını sağlam doğulmaması ilə barışa bilmirlər. Halbuki onların səhhətinin az da olsa düzəlməsi üçün valideyn qayğısı lazımdır. Ötən həftə mərkəzə gətirilən uşaqlardan birinin əqli geriliyi var.
Uşaq özünə xəsarət yetirir, başına döyür, əllərini, ayaqlarını dişləyir. Ana Bakının bütün uşaq evlərinə gedib, uşağı qəbul etməyiblər. Təsəvvür edin ki, hara olsa qoymaq istəyir ki, təki uşaqdan qurtulsun. Halbuki bu uşaq yalnız anasının yanında bir balaca sakit olur”.
Qeyd edək ki, hazırda mərkəzdə saxlanılan bacı-qardaşın geyimə və ərzağa ehtiyacı var: "Biz zəruri geyimlər aldıq, həkim müalicə təyin etdi. Amma uşaqların sayı çox olduğundan çatdırmırıq, kənardan heç kim kömək eləmir. Buna görə də ailələrdən xahiş edirik ki, azyaşlı uşaqlarınını paltarlarını atmasınlar. Bu geyimlərə ehtiyacımız var. Balacaların yay geyimi üçün köməklik göstərilməsini istəyirik”.
Xatırladaq ki, uşaqlara yardım etmək istəyənlər mərkəzə müraciət edə bilərlər.
