“Rayon sakini sadəcə olaraq avtomobil həvəskarıdır. Onun başqa məqsədi yoxdur və avtomobili satması onun şəxsi işidi”
Müasir dövrümüzdə sürətli və kreativ avtomobillərin həvəskarı kimi retro maşınların da kolleksiyaçılarına rast gəlmək mümkündür. Belə şəxslərdən biri də Goranboy rayon Dəliməmmədli şəhər sakini Nahid Tanrıverdiyevdir.
1937-ci ildə istehsal olunan "BMW” markalı avtomobil hazırda onun həyətindədir. Fərqli görünüşə malik 80 yaşlı maşın hələ də saz vəziyyətdədir. Yollarda şütüyən zaman hər kəs ayaq saxlayıb maşını izləyir. Almaniyada istehsal edilən, daha çox bu ölkədə filmlərdə çəkilən "BMW-328” Goranboya 7 il əvvəl gətirilib. Rəngi ilə daha çox diqqət çəkən "BMW”-nin qapıları da fərqli formada açılır. Avtomobilə yüksək məbləğdə pul verərək satın almaq istəyənlər də olub. Lakin sahibi maşının hədiyyə olduğunu, bu səbəbdən də heç kəsə satmayacağını bildirib.
Retro maşınların daimi olaraq istifadədə olmasının riskli olduğunu deyən Avtosfer.az saytının baş redaktoru Elməddin Muradlı belə avtomobil detallarının get-gedə sıradan çıxıb eroziyaya uğradığını və möhkəmliyini itirdiyini bildirib.
Onun sözlərinə görə, heç kim rayon sakini olan N.Tanrıverdiyevə qəti olaraq göstəriş verə bilməz ki, o avtomobili satsın və yaxud satmasın:
"Avtomobili satıb-satmamaq həmin şəxsin öz seçimidir. Bu növ maşınlar Azərbaycanda çoxdur. Belə avtomobillərin orijinallığı, detalları sahibləri tərəfindən qorunur. Əksəriyyətinin detalları dəyişdirilsə də, bəziləri zavoddan necə çıxıbsa elə də qalır. Lakin avtomobil üzərində mühəndis müəyyən yoxlanışlar apara bilər. Dayanıqlığını itirən detallar dəyişdirilə və sonra daimi istifadəsi təmin edilə bilər. Amma bu növ avtomobillər daha çox görünüş üçündür, insanlar buna hobbi kimi yanaşır. Bir qrup insan müasir avtomobilləri, digər insanlar isə retro avtomobilləri kolleksiya kimi yığır. Rayon sakini sadəcə olaraq avtomobil həvəskarıdır. Onun başqa məqsədi yoxdur və avtomobili satması onun şəxsi işidi”.
Yeganə Bayramova
