ABŞ Gürcüstanın Ermənistanla sərhəddinin möhkəmləndirilməsi üçün Tiflisə 10 milyon dollar ayırıb. Məlumata görə, müvafiq saziş Tiflisdə Gürcüstan Sərhəd Polisi ilə ABŞ-ın hərbi təhdidlərin azaldılması Agentliyi arasında imzalanıb.
Anlaşma əlavə müşahidə məntəqələrinin yaradılması, gecə saatlarında müşahidə aparan videokameraların quraşdırılması və digər texniki təchizat işlərinin görülməsini nəzərdə tutur. İlk növbədə "Qasımlı” və "Keda” sərhəd sektorlarının gücləndirilməsi planlaşdırılır.
"Atlas” Araşdırmalar Mərkəzinin sədri Elxan Şahinoğlu "Şərq”ə deyib ki, son zamanlar Gürcüstan hakimiyyətinin Rusiya ilə qaz danışıqları aparması Vaşinqtonu narahat edir: "İran qazının Ermənistan vasitəsilə Gürcüstana çatdırılması məsələsi gündəmə gəlib. Ağ Evin maraqlarına cavab verən odur ki, Tiflis Bakı ilə strateji mütəffiqliyini dərinləşdirsin. Bundan başqa, ABŞ istəmir ki, Tiflisin Rusiya və Ermənistanla əlaqələri genişlənsin. Belə olarsa, artıq İran, Ermənistan və Rusiya üçbucağı yaranır. Məhz, bu məqsədlə Ağ Ev Gürcüstan sərhəddlərini möhkəmləndirir. Eyni yardımları ABŞ vaxtilə Azərbaycana da göstərib. Misal olaraq, Xəzərdəki
və cənubdakı sərhəddlərimizi mükkəməl şəkildə qorumaq üçün müvafiq avadanlıqlar vermişdi. Görünür, eyni addımı Gürcüstan üçün də atır. Bir sözlə, ABŞ Cənubi Qafqazda Rusiya və İranın möhkəmlənməsini istəmir”.
Ayyət Əhməd
