Yay mövsümünün yekunlaşmasına az qalıb. Amma bazarlarda qarpızların qiyməti "əl yandırır". Bir müddət əvvəl qalxan qiymətlər yenə də dəyişməz olaraq davam edir. Vətəndaşlar qiymətlərin baha olmasından narazıdır.
Məsələ ilə bağlı "Sherg.az”a münasibət bildirən Azad İstehlakçılar Birliyinin sədri Eyyub Hüseynov qiymətlərin bir müddət bu trenddə davam edəcəyini bildirib.
Ekspertin sözlərinə görə, həqiqətən də əvvəlki illərlə müqayisədə bu il qarpızın qiyməti kəskin şəkildə artıb:
"Rayonlardan olan mütəxəsislərlə birlikdə bu qiymət artımını müzakirə edirik. Hazırda Qubada qarpızın qiyməti 80 qəpiyə qalxıb. Amma bu qiymət artımının bir müddət davam edəcəyi gözlənilir. Ehtiyatda olan qarpızlar tükənməkdədir. Həmçinin bostan qarpızları da yavaş-yavaş satış üçün bazara cəlb olunur. Bostanlarımızdan yığılan qarpızlar bazarda üstünlük təşkil etdikdən sonra qiymətlər enəcək. Təxminən Avqust ayının 15-dən sonra qarpızların qiyməti 10 faizə yaxın azalacaq. Həmçinin yemişin də qiymətində müəyyən ucuzlaşmalar olacaq”.
E.Hüseynov onu da əlavə edib ki, qarpızın kehfiyyətində də müəyyən problemlər yaşanır:
"Azad İstehlakçılar Birliyinin özündə olan cihazla giləmeyvələrin üzərində yoxlamalar aparılıb. Ölkə bazarında olan qarpız və yemişlərin 98 faizi nitratlarla zəngindir. Və bunlar da insanların sağlamlığı üçün təhlükəlidir. Düşünürəm ki, Qida Təhlükəsizliyi Agentliyi bu məsələləri həll etməlidir. Beləliklə də bazara keyfiyyətli və ucuz qarpızlar çıxarılmalıdır”.
Kənan Eynuroğlu
