"Ermənistanda siyasi məhbusun aclıqdan ölməsi məsələsinə insan haqlarından danışan Avropa təşkilatlarının və ölkələrinin heç birinin münasibət bildirməməsi təəccüblü deyil”.
Bunu "Sherg.az”a "Erməni Qartalları: Vahid Ermənistan" partiyasının sədr müavini, siyasi məhbus Mger Yegiazaryan aclıqdan ölməsi məsələsinə münasibət bildirərkən millət vəkili Rüfət Quliyev söyləyib.
Onun sözlərinə görə, nə Avropa təşkilatları, nə də Avropa dövlətləri separatçı ölkədə baş verən bu olaya münasibət bildirir:
"Yəni elə bir münasibət göstərildir ki, sanki belə bir hadisə olmayıb. Avropa Ermənistandakı Yegiazaryan olayına susur. Amma Azərbaycanda guya baş verən kiçik olaylar insan hüquq və azadlıqlarını qoruyan təşkilatlar və dövlətlər tərəfindən çox böyüdülüb, fərqli tərəflərə çəkilir. Fikrimcə, biz buna öyrəşmiş dövlətik. Hazırda Azərbaycana qarşı ikili standartlar var. Bütün bunlarında arxasında erməni lobbisi durur.
Eyni zamanda da Azərbaycanın iqtisadi inkişafı və beynəlxalq arenada nüfuzunun artması, bununla yanaşı ölkəmizdəki sabitlik bəzi ölkələri narahat edir. Ermənistanda baş verən məsələ fonunda onu anlamaq olar ki, ortada ikili standarlar var.
Həmin ikili standarlar da demək olar ki, bütün sahələrdə tətbiq olunur. Erməni siyasi məhbusun aclıqdan ölməsinə Avropa təşkilatlarının və ölkələrinin heç bir reaksiya verməməsinə elə də təəccüblənmədim. Çünki bu kimi arzuolunmaz hallarla çox rastlaşmışıq".
Qeyd edək ki, "Erməni Qartalları: Vahid Ermənistan" partiyasının sədr müavini, siyasi məhbus Mger Yegiazaryan aclıqdan ölüb. 1968-ci il təvəllüdlü məhbus cəza çəkdiyi "Nubarasen" həbsxanasında dünyasını dəyişib. Məlumata görə, Yegiazaryan ötən ilin 5 dekabr tarixində aclıq aksiyasına başlamışdı. Onun aclıqdan öldüyü bildirilir. Ermənistanın Ədliyyə Nazirliyi isə Yegiazaryanın ölüm səbəbini gizlədərək, faktla bağlı araşdırma aparıldığını bəyan edib.
Kənan Eynuroğlu
