"Azərbaycan neftinin bahalaşması Amerika ilə əlaqədardır”.
Bunu "Sherg.az”a Azərbaycan neftinin 59 dollara qədər bahalaşmasının səbəblərini izah edərkən Neft Araşdırmaları Fondunun prezidenti İlham Şaban deyib.
O bildirib ki, bahalaşma ABŞ enerji administrasiyasının həftəlik hesabatı ilə bağlıdır:
"Bu hesabat bazara kifayət qədər təsir etdi. Neft ehtiyatlarının azalması ilə bağlı məlumatlar öz əksini tapdı. Nəticə etibarı ilə bazarda neftin qiymətlərinin artması baş verdi”.
Qiymət artımının davamlı olmasını proqnozlaşdırmağın çətin olduğunu diqqətə çatdıran İ.Şaban deyib ki, bu növbəti hesabatlar və siyasi proseslərdən asılı olacaq:
"Sentyabrın əvvəlindən neftin 50 dollardan çox götürülməsi sistematik və dünyadakı siyasi proseslərlə bağlıdır. Meksika körfəzində neft hasilatı sahələrdə tüğyan edən qasırğalar hasilatın azalmasına gətirib çıxardı. Həmçinin Venesuelada ictimai-siyasi vəziyyətin kəskinləşməsi neftin qiymətlərinə təsir etdi. Bundan başqa Şimali Koreya ətrafında yaranan hərbi proseslər, neft daşımalarında risklərin artması xəbərləri də birjalara neftin qiymətinin artması ilə bağlı təkan verdi”.
Qeyd edək ki, "AzeriLight" markalı neftin 1 barelinin dəyəri 0,92 dollar və ya 1,6 faiz artaraq 58,55 dollar təşkil edib.
Aysel Aslan
