Həkim-psixoterapevt Paşa Yaqub övliyalar haqqında araşdırmalarını bir kitabda-“Övliyalar ensiklopediyası” adlandırdığı topluda cəmləşdirib. “Övliya” ərəb dilində «vəli» sözünün cəmi olub, “həyatını Allah yolunda sərf edərək, ona yaxınlaşmağa nail olmuş müqəddəs insan”, “müqəddəs, təmiz, pak, saf şəxsiyyət” anlamını bildirir.
Övliyalarımızdan bəhs edən 680 səhifəlik bu kitab çox maraqlı və oxunaqlı bir dildə yazılıb. Azərbaycanın ictimai fikir tarixində İslam dininin rolu misilsizdir. İslamın bir sıra təriqət və cərəyanları, tanınmış sufi alimləri, şeyxləri, dövrünün görkəmli elm və mədəniyyət xadimləri cəmiyyətimizdə zaman-zaman baş vermiş sosial-siyasi hadisələrdə islami dəyərləri, müqəddəs xanəgahlarımızı, pirlərimizi, ziyarətgahlarımızı uzun əsrlər boyu qoruyaraq bu günümüzə gətirib çıxarıblar. Əsrlərin daş yaddaşı olan kitabələrdə Azərbaycanda fəaliyyət göstərmiş neçə-neçə sufi cəmiyyətlərin, kəramətli şeyxlərin, ruhani alimlərin adlarına rast gəlmək olar. Məlumdur ki, İslam dünyasında geniş yayılmış sufizm çox mürəkkəb bir fəlsəfi cərəyan olub. Azərbaycanın ictimai həyatında, tarixində onun İslam dünyası ilə mədəni-siyasi əlaqələrində orta əsr sufi cəmiyyətinə mənsub olan övliyalarımızın, ruhani alimlərimizin, şeyxlərimizin, şairlərimizin özünəməxsus, mühüm, ləyaqətli yeri olub. Son orta əsrlərdən bəhs edən kitablardan da görürük ki, sufi cəmiyyətlərində Allaha qovuşmaq – təsəvvüf, vəhdəti-vücud məqsədinin metodları, eləcə də xüsusi təlimlər müxtəlif formadadır.
Kitabda 13-cü əsrdə Türkiyədə əsası Mövlana Cəlaləddin Rumi tərəfindən qoyulmuş mövləvilik (mövlə ərəb dilində “Allah, Tanrı, Yaradan” deməkdir), orta əsrlərdə Kiçik Asiyada, o cümlədən, Azərbaycanda meydana gələn, “Zəhmət qardaşları” cəmiyyətinin üzvləri hesab edilən əxilik (əxi sözü ərəb dilində “qardaş” anlamını ifadə edir), eləcə də nəqşibəndilik, ələvilik və s. təriqətlər və onların nümayəndələri barədə maraqlı yazılar da yer alıb.
“Övliyalar ensiklopediyası” Azərbaycanda (bəlkə də dünyada) bir ilkdir. İndiyədək çox mövzularda ensiklopediyalar çap olunsa da, övliyalıq mövzusunda ensiklopediya tərtib olunmayıb. Bu ilkə imza atan yazıçı-publisist, araşdırmacı, tanınmış psixoterapevt, elmi-lədun bilicisi Paşa Yaqub 36 kitab müəllifidir.
“Övliyalar ensiklopediyası” «Mənəvi Dəyərlərin Təbliği» Fondunun maliyyə dəstəyi və Dini Qurumlarla İş üzrə Dövlət Komitəsinin rəyi əsasında çap olunub. Kitabın ikinci cildi də nəşrə hazırlanır.
Arzu və təklifləri olanlar müəlliflə əlaqə saxlaya bilərlər:
050 375 30 97
051 777 70 40
