"Cəmiyyətdə aqressivlik yüksək olduğuna görə, insanlar tək Gəncənin icra başçısı Elmar Vəliyevə sui-qəsd təşkil olunmasına deyil, bütün məsələlərdə emosional davranırlar”.
Bunu "Sherg.az”a icra başçısının sui-qəsdə məruz qalmasının bəzi insanlar tərəfindən sevinclə qarşılanmasının səbəblərini izah edərkən millət vəkili Fazil Mustafa söyləyib. Deputatın fikrincə, insanların məşğulluqla bağlı problemləri, sosial çətinlikləri aqressiya ilə davranmalarına səbəb olur:
"Çalışmaq lazımdır ki, bu tip məsələlərdə daha soyuqqanlı addım atılsın. Məmurlar isə fəaliyyətlərində şəffaflıq yaratmağa çalışmalıdırlar. Çünki insanların sevgisini qazanmadan uğur əldə etmək olmaz. Hansısa addım atdıqda insanların rifahını düşünmək, onların qayğıları haqqında fikir sahibi olmaq lazımdır. Bu olmadıqda problemlərin həlli çətin olur.
Medianın da üzərinə böyük məsuliyyət düşür. Mətbuatda səsləndirilən tənqidlərə reaksiya verilməlidir ki, məmurlar vəzifə məsuliyyətini dərk etsinlər. KİV-lərdə yüzlərlə informasiyalar dərc olunur, fikirlər səsləndirilir, faktlar ortaya qoyulur. Çox zaman buna reaksiya verilmədiyinə görə, məmurlar arxayın olurlar ki, artıq heç bir məsuliyyət daşımırlar. Reallıqda isə məsuliyyət olmayan yerdə özbaşınalıq da baş alır”.
F.Mustafa əlavə edib ki, insani cəhətdən bu cür hadisənin baş verməsinə sevinmək düzgün deyil:
"Hər halda insanların doğru həyəcanını ifadə etməsi demək deyil. Amma cəmiyyəti də hansısa davranışına görə qınamaq olmur. Elə fəaliyyət göstərmək lazımdır ki, insanlar bu cür hadisənin baş verməsinə görə təəssüflənsinlər. Ona görə, xeyirli işlər görmək lazımdır. Məmurlar insanları incitməkdən yayınmalıdırlar”.
Qeyd edək ki, son dönəmlər yüksək vəzifələrdə çalışan məmurların dünyalarını dəyişməsi və müxtəlif hadisələr nəticəsində ağır xəsarətlər almaları virtual və real həyatda bəzi insanlar tərəfindən sevinclə qarşılanır. Bunun səbəbi isə əksər məmurların vəzifələrindən sui-istifadə edərək vətəndaşları incitməsi, özlərini xalqın xidmətçisi deyil, ağası kimi aparması, insanları bürokratik süründürməçiliyə məruz qoymaları və sairlə izah olunur.
Aysel Aslan
