"Fevral ayından etibarən mənzil bazarında ciddi dəyişikliklər baş verib. Artıq mənzil və ya obyektlər dollarla satışa çıxarılır”. Bu barədə "Şərq”ə Əmlak Ekspert Mərkəzinin rəhbəri Ramil Osmanlı bildirib.
Onun sözlərinə görə, manatın ikinci devalvasiyasından dərhal sonra qiymətlər artıb. Lakin bahalaşma cəmi bir neçə gün davam edib: "Hazırda mənzil bazarında durğunluq yaranıb. Hətta dəyərindən aşağı qiymətlə təklif edilən mənzillər belə satılmır. Aparılan müşahidələrə görə, mənzil bazarında ciddi dəyişikliklər var. Əhalinin manata etibarı azaldığı üçün 2007-2008-ci ildə olduğu kimi, mənzillər dollarla təklif olunur”.
Mərkəz rəhbəri bəyan edib ki, yalnız yeni tikililərdə cüzi qiymət artımı müşahidə edilir. Köhnə tikililərdə isə mənzillərin qiyməti bahalaşdırılmayıb: "Məsələn, metronun "Elmlər Akademiyası” stansiyasının yaxınlığında köhnə tikilidə 2 otaqlı mənzillər 80-85 min manata təklif edilir. Lakin yeni tikililərdə hər kvadratmetrə görə qiymətlər 100-150 manat arasında artırılıb. Metronun "Nərimanov” stansiyasının ətrafında 3 otaqlı mənzillərin qiyməti 110-115 min manatadır. Metronun "Əhmədli” stansiyasının yaxınlığında 3 otaqlı 80-85 min manata təklif edilir”.
Ekspert diqqətə çatdırıb ki, ötən ilin əvvəlinə nisbətən qiymətlər ucuz olsa da, alqı-satqı yoxdur: "Son bir neçə ildə mənzil bazarında indiki kimi durğunluq müşahidə edilməyib. Hələlik alıcılar gözləmə mövqeyindədirlər”.
Ayyət Əhməd
