Türkiyə XİN başçısı Bakıda önəmli müzakirələr aparıb
Dünən Azərbaycanda səfərdə olan Türkiyənin Xarici işlər naziri Mövlud Çavuşoğlu Prezident İlham Əliyev tərəfindən qəbul olunub. Türkiyənin XİN rəhbərinə Ankarada törədilmiş terror aktına görə, başsağlığı verən Prezident İlham Əliyev bu ağır günlərdə Azərbaycan xalqının hər zaman olduğu kimi, Türkiyənin yanında olduğunu diqqətə çatdırıb.
Türkiyə Prezidenti Rəcəb Tayyib Ərdoğanın zəng vuraraq, Bakıya gələ bilməyəcəyini bildirdiyini deyən dövlət başçısı bunu anlayışla qarşıladığını diqqətə çatdırıb.
Azərbaycan və Türkiyə XİN başçılarının görüşü keçirilib
Prezident İlham Əliyevlə görüşdən sonra Azərbaycan və Türkiyə XİN başçılarının görüşü keçirilib. Görüşdə ikitərəfli əməkdaşlıqla bağlı bir sıra məsələlər, regiondakı vəziyyət, Dağlıq Qarabağ münaqişəsinin nizamlanması yolları müzakirə edilib. Azərbaycan XİN başçısı Elmar Məmmədyarov da çoxsaylı insan tələfatına səbəb olan Ankaradakı terror aktı ilə əlaqədar
türkiyəli həmkarına və Türkiyə xalqına başsağlığı verib. Görüşdən sonra jurnalistlərə açıqlamasında M.Çavuşoğlu Dağlıq Qarabağ münaqişəsinin nizamlanması məsələsində Türkiyənin Azərbaycanı tam dəstəklədiyini vurğulayıb: "Bu məsələdə birgə fəaliyyət göstəririk. Fevralın 26-da Xocalı faciəsinin növbəti ildönümünü qeyd edəcəyik. Bu soyqırımı törədənləri lənətləyirik”.
"Terrorizmlə mübarizədə birlikdə olmalıyıq”
Türkiyənin Xarici işlər naziri Mövlud Çavuşoğlu Azərbaycan xalqına verdiyi dəstəyə görə təşəkkür edib. XİN başçısı Ankarada törədilən terror aktına görə, Türkiyə-Azərbaycan Yüksək Səviyyəli Strateji Əməkdaşlıq Şurasının iclasının baş tutmamasına təəssüfləndiyini dilə gətirib: "Yaxın gələcəkdə biz yenidən bu iclası təşkil etmək niyyətindəyik. Terrorizmlə mübarizədə birlikdə olmalıyıq. Biz PKK, YPG, PYD kimi terror təşkilatları arasında fərq qoymuruq və onlarla mübarizə aparırıq. Terrorizmə qarşı mübarizədə Azərbaycanla heç bir fikir ayrılığımız yoxdur. Azərbaycan da terrorizmə qarşı mübarizədə Türkiyənin mövqeyini bölüşür”.
"PYD lideri şəxsən Əsədin özündən təlimat alıb...”
Mövlud Çavuşoğlu Ankaradakı olayla bağlı sensasion açıqlamalar verib. O deyib ki, hadisəni törədən PYD üzvləri arasında Kandildən gələn PKK-çılar da var: "Bizdə kəşfiyyat məlumatları var. PYD lideri Saleh Müslim Suriya rejimi tərəfindən Kandildən çağırılıb. Türkiyəyə qarşı hücumlar təşkil etmək üçün birbaşa Əsədin özündən təlimat alıb. Bütün sənədlər əlimizdədir”.
"Biz terrorun bütün forma və təzahürlərini qınayırıq”
Azərbaycan XİN rəhbəri Elmar Məmmədyarov da terrorçuluqla mübarizədə dövlətimizin mövqeyinin açıq və dəyişməz olduğunu deyib. Nazir bəyan edib ki, Azərbaycan hökuməti terrorun bütün formalarını qınayır: "Terror qurbanlarının ailələrinə başsağlığı veririk, yaralananlara isə ən qısa zamanda şəfa tapmağı arzulayırıq”.
Məlumat üçün bildirək ki, fevral ayının 19-da Azərbaycan, Gürcüstan və Türkiyə Xarici işlər nazirləri Tiflis şəhərində beşinci üçtərəfli görüş keçirəcəklər. Artıq görüş üçün Türkiyə və Azərbaycan XİN rəhbərləri Gürcüstana yollanıblar.
İsmayıl
