Qardaşların cəsədi lift çuxurundan tapılıb
İstanbulun Çekmeköy ərazisində 2 qardaş itkin düşüb. 4 və 8 yaşlarında olan Həsən, Hüseyn Büyür qardaşları 13:30 radələrində yoxa çıxdıqdan sonra onlardan xəbər gəlməyib. Valideynləri polisə müraciət edəndən sonra axtarışlar başlayıb.
Polis qrupları və AFAD tərəfindən axtarılan azyaşlı qardaşlar evlərinin arxasındakı inşaat sahəsindən, lift çuxurundan tapılıb. Yağış suyu ilə dolan çuxurdan uşaqların cansız bədəni çıxarılıb. Hadisədən əvvəl küçədən keçən zaman qeydə alınan görüntüləri ortaya çıxıb. Həmin görüntülərdə qardaşlar biri-birlərini qucaqlayıblar.
Qardaşların anası Hanife Büyür deyir ki, əvvəl orada oyuncaq gördükləri üçün uşaqlar onu götürməyə gedib. "Oranı bağlasalar olmazdımı? Mən onlara görə 2 övladımdan oldum" deyən ananın halı ürəkləri dağlayır. Uşaqların atası İlker Büyür isə ağlamaqdan danışa bilməyib.
Aytac Ali
