ABŞ-ın Nyu-York şəhərində BMT baş qərargahı önündə Azərbaycanın işğaldan azad edilmiş ərazilərində Ermənistan tərəfindən yerləşdirilmiş minaların xəritəsinin verilməməsinə etiraz olaraq sərgi keçirilib.
“Report” xəbər verir ki, sərgidə Ermənistanın Azərbaycanın tarixi torpaqlarında terror siyasətini davam etdirdiyinə dair faktlar, minaya düşərək faciəvi şəkildə həyatlarını itirən hərbi və mülki şəxslərin fotoları əks olunub.
Sərgi Diasporla İş üzrə Dövlət Komitəsinin dəstəyi və Azərbaycan - Nyu-York Assosiasiyasının təşkilatçılığı ilə baş tutub.
Sərgi ABŞ ictimaiyyətinin, BMT-də fəaliyyət göstərən media nümayəndələrinin və diplomatların diqqətini cəlb edib.
Azərbaycan - Nyu-York Assosiasiyasının sədri Ərcan Yerdələnli sərgi ziyarətçilərini erməni silahlı birləşmələri tərəfindən zəbt olunan Azərbaycan torpaqlarının hər qarışında basdırılan minaların partlaması nəticəsində hərbi və mülki şəxslərin həlak olmağa davam etdiyi haqqında məlumatlandırıb.
BMT-də fəaliyyət göstərən jurnalistlər Kəlbəcər rayonunda peşə fəaliyyətini yerinə yetirərkən minaya düşərək şəhid olan jurnalistlər Sirac Abışov və Məhərrəm İbrahimov haqqında məlumat alıb, jurnalistlərə qarşı atılmış bu mənfur addımın qəbuledilməz olduğunu deyiblər.
Sərgi ilə tanış olan Efiopiya, Gürcüstan, Rusiya və Çin diplomatları Ermənistan tərəfinin təcavüzkar addımlarını qınayıb və cinayətkarların beynəlxalq məhkəmələrdə cavab verməli olduqlarını deyiblər.
Ə.Yerdələnli bildirib ki, 20-dən çox fotonun nümayiş olunduğu sərgini keçirməkdə məqsəd dünyanın ən böyük təşkilatı olan BMT-də fəaliyyət göstərən əcnəbilərin diqqətini cəlb etmək və Azərbaycanın haqq səsini dünyaya çatdırmaqdır: “Biz BMT-nin önünə əbəs yerə gəlməmişik. Buradakı güclər – beynəlxalq təşkilatların nümayəndələri, hüquq müdafiəçiləri dünyada baş verənlərə biganə qalmadıqlarını deyirlər. Ermənilərin bu əməlləri cinayət və etnik təmizləmədir. Minalanmış ərazilərlə bağlı xəritələrin Ermənistan tərəfindən Azərbaycana verilməməsi həm də, bölgədə sülhün bərpa olunmasına ciddi əngəl yaradır. Bu məsələ ən qısa zamanda həllini tapmalıdır”.
