Azərbaycanda muzdla çalışan işçilərin sayı artıb. 2016-cı il yanvarın 1-nə olan vəziyyətə görə, ölkədə muzdla çalışan işçilərin sayı 1495,8 min nəfər olub. Onlardan 877,4 min nəfəri iqtisadiyyatın dövlət sektorunda, 618,4 min nəfəri isə qeyri-dövlət sektorunda fəaliyyət göstərib.
Dövlət Statistika Komitəsindən verilən məlumata görə, muzdla işləyənlərin 22,6 faizi təhsil, 19,0 faizi ticarət, nəqliyyat vasitələrinin təmiri, 12,1 faizi sənaye, 8,9 faizi əhaliyə səhiyyə və sosial xidmətlərin göstərilməsi, 6,2 faizi tikinti, 4,9 faizi nəqliyyat və anbar təsərrüfatı, 3,9 faizi peşə, elmi və texniki fəaliyyət, 3,0 faizi kənd təsərrüfatı, meşə təsərrüfatı və balıqçılıq, 1,7 faizi informasiya və rabitə, 17,7 faizi isə iqtisadiyyatın digər sahələrində məşğul olub. Məsələni şərh edən tanınmış iqtisadçı Natiq Cəfərli "Şərq”ə söyləyib ki, ölkəmizdə statistika artıq siyasiləşib. Bunu hamı qəbul edir: "Yəni statistik rəqəmlərin müəyyən məcraya yönləndirilməsi mövcuddur. Məsələn, ölkəmizdə işsizliklə bağlı rəsmi rəqəm 5 faiz göstərilir. Amma görünən odur ki, rayonlarda iş yarmarkası elan edəndə ora minlərlə insan gəlir. Rəsmi məlumatlara görə isə, ölkədə işsizlərin sayı 30 mini keçmir. Amma bir rayonda iş elanları olanda 1 yerə 2-3 yüz insan müraciət edir. Bunun özü elə işsizliyin 5 faiz olmasını yalanlayır. Statistik məlumatların bu tipli hesablamaları əslində ölkədəki iqtisadi vəziyyəti doğru-dürüst qiymətləndirməyə əsas vermir. Yəni əlimizdə çox dəqiq faktlar olmalıdır ki, bu trendləri müəyyən edə bilək və gələcəkdə ölkənin iş bazarında baş verə biləcək problemləri indidən təsdiq edək. Buna uyğun da yol xəritəsi hazırlaya bilək. Ölkədə buna böyük bir ehtiyac var. Əksinə isə görürük ki, Azərbaycanın ticarət sahəsində çox ciddi problemlər mövcuddur. Böyük və kiçik ticarət mərkəzləri, dükanları bağlanır. Hətta bu halı şəhərdə vizual olaraq görə bilərik”.
Ekspertin qənaətincə, ölkəmizdə həmişə daha çox iki sekorda - təmir tikinti və pərakəndə ticarət sektorunda iş yerləri yaradılırdı: "Amma indi hər iki sektorda ciddi problemlər yaşanır. Hökumət investisiyalarında 4 milyarda yaxın azalma müşahidə olunur. Bunun özü tikinti sektorunda işsizliyin sayını xeyli dərəcədə artırır. Üstəgəl, pərakəndə ticarət dövriyyəsini zəiflədir. Mağazaların bağlanmasına, geyim, elektrotexnika malları və mebelin ticarət dövriyyəsinin azalmasına səbəb olur. Bir sözlə, Statistika Komitəsinin rəsmi məlumatında "İş yerləri artıb” deyə informasiyanın getməsi ən yumşaq desək, inandırıcı deyil. Həqiqəti əks etdirmir. Reallığı bilməsək, bundan çıxış yollarını tapmaq və müəyyən yol xəritəsi hazırlamaq çox çətin olacaq”.
Ayyət Əhməd
