Bu günlərdə Maliyyə Nazirliyinin (MN) "Bakı Fond Birjası” QSC-də hərraca çıxartdığı manat və ABŞ dollarında olan dövlət istiqrazlarının buraxılışı uğurla həyata keçirilib. Nazirliyin mətbuat xidmətindən verilən məlumata görə, ümumi həcmi 12,0 milyon ABŞ dolları olan 1 illik və 2 illik dövlət istiqrazları müvafiq olaraq 2.77 faiz və 3.02 faiz gəlirlilik dərəcəsi ilə investorlar tərəfindən alınıb.
Eyni zamanda ümumi həcmi 20,0 milyon manat məbləğində 6 aylıq və 1 illik dövlət istiqrazları müvafiq olaraq 7.79 faiz və 8.8 faiz gəlirlilik dərəcəsi ilə yerləşdirilib. MN ümumi həcmi 500,0 milyon ABŞ dolları və 400,0 milyon manat məbləğində dövlət qeydiyyatından keçmiş emissiya prospektlərinə uyğun olaraq cari ilin sonunadək dövlət istiqrazları üzrə mütəmadi olaraq hərracların keçirilməsini təmin edəcək.
İstiqrazların mahiyyətindən danışan tanınmış iqtisadçı Nazim Məmmədov "Şərq”ə söyləyib ki, bu hökumətin daxili borclanmasıdır: "Ancaq istiqrazlara xalqın marağı o vaxt çoxalır ki, depozitlər üzrə bank faizləri aşağı olur. Həm də bankdan fərqli olaraq dövlətin istiqrazları daha etibarlıdır. Çünki bank iflas uğraya bilər. Dövlət istənilən halda borcunu istiqrazlar üzrə elan edib, qaytarır. Bunun faizləri bankların təklif etdiyi faizlərdən azacıq yüksək olsa, eyni zamanda cəlbediciliyi yaxşı olsa, üstəgəl, vətəndaşların pulu varsa, bu bazar işləyəcək. Amma indiki halda buna ümidim azdır. Ola bilsin ki, həmin istiqrazları Mərkəzi Bank alsın. O, hökumətin tərkibində deyil. İstiqrazları borc kimi alıb, sonradan qaytara bilər. Həmçinin Dövlət Neft Fondu da ala bilər. Ancaq kütləvi olaraq vətəndaşların bu borc kağızlarını almasına ümidim azdır. Üstəgəl, dövlət onları xarici valyutada deyil, manatla buraxacaq. Manata isə inam çox aşağı səviyyədədir. Ona görə də, birinci hökumətin maliyyə siyasətinə inam yaradılmalıdır. Manata inam artırılmalıdır. Belə olarsa, istiqrazın bazarı işləyə bilər”.
Ayyət Əhməd
