Azərbaycan iqtidarı ilə müxalifət partiyaları arasında sayca üçüncü və hələlik sonuncu görüş 2015-ci il may ayının 15-də keçirilib. Növbəti görüşün nə zaman reallaşacağı ilə bağlı məlumat yoxdur. Müxalifət tərəfdən görüşün təşkil edilməsində əlaqələndirici funksiyanı yerinə yetirən Klassik Xalq Cəbhəsi Partiyasının sədri Mirmahmud Mirəlioğlu "Şərq”ə açıqlamasında deyib ki, görüşün reallaşması təşkilatçı olaraq Prezident Administrasiyasından asılıdır:
"Hökumət müxalifətlə dialoqa hələlik ehtiyac görmür. Əgər iqtidar nə vaxt görüş təşkil etsə, dialoq o zaman baş tutacaq. Yəqin ki, ölkədə baş verən proseslərə görə, baş qarışıqdır. Canları sağ olsun!”. KXCP sədrinin sözlərinə görə, dialoq məsələsi siyasi partiyalarla bağlı deyil: "Yeni Azərbaycan Partiyası ölkədə qeydiyyatdan keçmiş 55 siyasi partiyadan biridir. Görüş təklifi sadəcə hakim partiyaya edilmir. Ümumiyyətlə, dialoq məsələsi siyasi partiyalarla bağlı deyil. Dialoq ictimaiyyətlə iqtidar arasındakı məsələdir. Azərbaycan hökumətinin də konkret olaraq bu məsələ ilə bağlı göstərişi və iş prinsipi var”. YAP-ın Siyasi Təhlil və Proqnozlaşdırma şöbəsinin müdiri, millət vəkili Aydın Mirzəzadə isə qəzetimizə bildirib ki, hakim partiyanın təşəbbüsü ilə dəfələrlə həm partiya qərargahında, həm də kənarda iqtidar-müxalifət görüşü təşkil edilib: "Növbəti görüşün keçirilməsinə YAP hər zaman hazırdır. Amma müxalifət partiyalarından YAP-a heç bir dialoq təklifi daxil olmayıb. Ötən illər ərzində biz buna rast gəlməmişik. Bir qayda olaraq ya hakim partiya tərəfindən, ya da beynəlxalq təşkilatların Bakıdakı nümayəndələrinin təşəbbüsü ilə bu cür görüşlər təşkil edilib”.
İsmayıl
