"Şəhid ailələri, Qarabağ müharibəsi əlilləri, qaçqın və məcburi köçkünlər, aztəminatlı ailələrə dövlətin qayğısı həmişə prioritet olub".
Bunu "Sherg.az"a millət vəkili Aydın Hüseynov deyib.
Parlamentari qeyd edib ki, sözügedən kateqoriyaya aid olan insanların sosial müdafiəsinin gücləndirilməsinə ən yüksək səviyyədə nail olunub:
"Onların sosial şəraitinin yaxşılaşdırılması üçün Azərbaycan dövləti çox ciddi tədbirlər həyata keçirib, məcburi köçkünlərin mənzillə təmin olunması, sosial vəziyyətinin yaxşılaşdırılması, məşğulluğunun artırılması üçün xüsusi dövlət proqramları qəbul olunub və uğurla həyata keçirilir. Bundan başqa ötən aylardan şəhid vərəsələrinə 11 min manat birdəfəlik ödəmənin verilməsinə başlanılın və artıq bir əksər şəhid vərəsəsinə bu məbləğ ödənilib. Eyni zamanda aztəminatlı ailələrin hər birinə bayramqabağı 100 manat birdəfəlik yardım verildi. Bütün bunlar Azərbaycanda sosial siyasətin uğurla aparılmasının bariz nümunəsidir".
A.Hüseynov hesab edir ki, aparılan uğurlu sosial siyasət nəticəsində ölkəmizdə məcburi köçkünlərin məskunlaşdığı bütün çadır şəhərcikləri ləğv olunub:
"Bakıda, digər rayon mərkəzlərində məcburi köçkünlər üçün çoxmərtəbəli binalar tikilərək istifadəyə verilir. Hazırda da məcburi köçkünlərin mənzil-məişət şəraitinin yaxşılaşdırılması, sosial müdafiəsinin gücləndirilməsi sahəsində aparılan genişmiqyaslı işləri davam etdirilir. Eyni zamanda, müharibə əlilləri, şəhid ailələri, onların övladları üçün dövlət lazımi qayğını göstərir. Hər il ölkə Prezidentinin məhz özəl gününü məcburi köçkünlərlə, sərhəd bölgəsində, sosial qayğıya ehtiyacı olan insanlarla qeyd etməsi isə onun humanistliyinin, öz xalqına diqqət və qayğısının aydın təzahürüdür".
Ayyət Əhməd
