"Səhhətim heç yaxşı deyil. Həkimlər də ümidverici bir söz demirlər”. Bu sözləri "sherg.az”a uzun müddətdir sağlamlıq problemləri yaşayan tanınmış təhsil eksperti, Azərbaycan Təhsil Şurasının sədri Əjdər Ağayev söyləyib. Qocaman təhsil mütəxəssisi bir müddətdir müalicə aldığını bildirib:
"Azərbaycanda müalicə olunuram. Xarici ölkələrə müraciət etmədim. Həkimlərim tibbi problemlərimin ciddi olduğunu deyirlər. Bütün bədənimdə ağrılarım var. Həm ürəyimdə, həm də digər daxili orqanlarımda problemlərim var. Görürsünüz, danışmaqda da çətinlik çəkirəm, səsim çıxmır. Həkimlər müalicə üçün konkret vaxt müəyyən etməyiblər. Ömürlük müalicədən, dərmanlardan asılı olacağam”.
Qeyd edək ki, bir neçə gün əvvəl Əjdər Ağayevin qızı İlhamə Rəsulova AzEdu.az-a atasının vəziyyəti stabil olduğunu söyləyib:
"Atam çox zəifdir. Prostat problemindən əziyyət çəkir. Sadəcə, ürəyində kardiostimulyator (ürək ritmlərini tənzimləyən cihaz) olduğuna görə müalicədə çətinlik yaranır”.
Aysel Aslan
