"Beynəlxalq Qızıl Xaç Komitəsi və Qızıl Aypara Cəmiyyəti humanitar təşkilatlardır və humanitar hüquqdan irəli gələn vəzifələrin icrası istiqamətində çox böyük işlər görürlər”.
Bu barədə "Sherg.az”a Azərbaycan Hökuməti ilə Beynəlxalq Qızıl Xaç və Qızıl Aypara Cəmiyyətləri Federasiyası arasında Anlaşma Memorandumunun imzalanmasından danışarkən "Konstitusiya” Araşdırmalar Fondunun rəhbəri Əliməmməd Nuriyev bildirib.
O vurğulayıb ki, Dağlıq Qarabağda girov saxlanan azərbaycanlılarla əlaqələrin yaradılmasında federasiyanın mühüm rolu var:
"Beynəlxalq təşkilatla münasibətlərin genişləndirilməsində əsas məqsəd humanitar əlaqələrin daha da yaxşılaşdırılmasıdır. Bu təşkilatlar işğal olunmuş Azərbaycan torpaqlarında girov saxlanan həmvətənlərimizin qaytarılmasına, onların ailələri ilə əlaqələrinin yaradılmasına şərait yaradırlar. Ermənistanın Azərbaycan torpaqlarını işğal etməsi nəticəsində çox sayda vətəndaşımız əsir və girov götürülüb.
Beynəlxalq Qızıl Xaç Komitəsinin (BQXK) əməkdaşları işğal olunmuş torpaqlarımızda girov saxlanan Dilqəm Əsgərov və Şahbaz Quliyevlə mütəmadi görüşlər təşkil edirlər. Bu təşkilat girovların müvəqqəti saxlanma yerlərinə də tez-tez baş çəkən qurumdur.
Azərbaycan ərazilərinin işğal olunması faktı qalmaqdadır. Ona görə, beynəlxalq humanitar təşkilatlarla Azərbaycan arasında müqavilələrin imzalanması müsbət haldır. Baş nazirin müavini Əli Əhmədovun da bu istiqamətdə səsləndirdiyi fikirlər, Dilqəm və Şahbazın girovluqdan azad edilməsi istiqamətində fəal işlər aparılmasını təklif etməsi kifayət qədər əhəmiyyətlidir. Bu cür anlaşmalar girov, əsir saxlanan həmvətənlərimizlə bağlı məlumatların beynəlxalq ictimaiyyətə çatdırılmasında əlavə kanal olduğuna görə, olduqca vacib amildir”.
Qeyd edək ki, Azərbaycanla Federasiya arasında memorandumun imzalanmasında məqsəd Azərbaycanla Federasiya arasında qarşılıqlı maraq doğuran sahələrdə əməli əməkdaşlığın genişləndirilməsi üçün münbit şəraitin yaradılmasıdır. Azərbaycan tərəfindən çıxış edən baş nazirinin müavini Əli Əhmədov diqqətə çatdırıb ki, işğal olunmuş Azərbaycan torpaqlarında girov saxlanan Dilqəm Əsgərov və Şahbaz Quliyevin azad olunması istiqamətində Beynəlxalq Qızıl Xaç və Qızıl Aypara Cəmiyyətləri Federasiyası öz imkanlarından, nüfuzundan istifadə etməlidir. O, günahsız insanların həbsdən azad edilməsi istiqamətində fəal işlər aparılmasının vacibliyini vurğulayıb.
Aysel Aslan
