Türkiyə Prezidenti Rəcəb Tayyib Ərdoğanın bu il fevral ayının ikinci yarısında Azərbaycana səfəri planlaşdırılır. Ərdoğanın Bakıya gəliş səbəbi bəlli olsa da, ekspertlər iki dövlət rəhbərinin indiki kritik məqamda siyasi və iqtisadi mühüm məsələləri müzakirə edəcəklərini iddia edirlər.
Tanınmış politoloq Tofiq Abbasov hesab edir ki, Ərdoğanın Bakıya səfəri Azərbaycanla Türkiyə arasında geniş formatda olan əməkdaşlıq layihələri baxımından olduqca vacibdir. Çünki bu layihələrin əksəriyyəti enerji daşıyıcılarının Xəzər bölgəsindən Avropaya nəql olunması ilə bağlıdır. Politoloq son dövrlərdə iqtisadi müstəvidə strateji əməkdaşlıq formatının getdikcə genişləndiyini bildirib: "Bölgədə təhlükəsizlik problemləri aktuallaşır. Məlum hadisələr, Yaxın Şərqdə gedən proseslər, İraq və Suriyadakı dağıdıcı meyllər digər ərazilərə də yayılır. Qafqaz bölgəsində, Türkiyənin şərqində sabitlik pozulmasın deyə, Azərbaycanla Türkiyə arasında çox sıx əməkdaşlıq var. Yəni strateji məlumatlar mübadiləsi, qabaqlayıcı tədbirlərin görülməsi, stabilləşmə prosesinin etibarlı əllərdə saxlanılması işləri daha güclü qarşılıqlı fəaliyyət tələb edir. Hazırda Bakı ilə Ankara arasında tam anlaşma şəraitində razılaşdırılmış kurs həyata keçirilir. Digər tərəfdən, Rusiya ilə Türkiyə arasında münasibətlər gərginləşməkdədir. Ankara Azərbaycanı vasitəçi tərəf kimi görür. Burada bir vacib məqam isə Azərbaycanın bölgədə funksional rolu və dövlət başçısının mövqeyinin nəzərə alınması ilə bağlıdır. Yəni Bakı Ankara ilə Moskva arasındakı münasibətlərinin normallaşmasında pozitiv rol oynaya bilər. Bu səfər iki ölkə münasibətlərindəki gözləntiləri doğrultmaq məqsədi də daşıyır”.
Qərb Universitetinin professoru, politoloq Fikrət Sadıqov da bildirib ki, hər iki ölkə başçısının iştirak edəcəyi iclasda müəyyən planlar cızılacaq və bir sıra məsələlər aydınlaşdırılacaq: "Eyni zamanda, daha da sıx əməkdaşlığın inkişafı ilə bağlı yeni yolların axtarılması müzakirə olunacaq. Təbii ki, Yaxın Şərqdə baş verən hadisələr və regionda yaranmış geosiyasi gərginlik fonunda bu görüş vacibdir. Çünki hər iki dövləti ətrafda baş verən hadisələr ciddi narahat edir”. Ekspert iki dövlət arasında yeni sazişin, hərbi əməkdaşlığın imzalanacağı iddiasına da münasibət bildirib: "Bizim Türkiyə ilə kifayət qədər müqavilələrimiz, sazişlərimiz var. Türkiyə bütün beynəlxalq arenalarda bizi dəstəkləyir. Rəsmi Bakı da hər zaman Türkiyənin yanındadır, müttəfiqidir. Düzdür, müxtəlif məsələlərdə fərqli mövqeyimiz var. Amma əsas münasibətlərimiz çox yaxşıdır. Düşünmürəm ki, hansısa əlavə müqaviləyə ehtiyac olsun”.
İsmayıl
