Bir qism də düşünür ki, Rusiya Ermənistandan çıxsa, onlar təkbaşına Azərbaycan və Türkiyə ilə bacara bilməyəcəklər
Ermənistanın Gümrü şəhərində rus hərbçilərinə qarşı piket təşkil olunub. Aksiyanın təşkilatçıları iddia edirlər ki, onların etirazları Rusiyanın Ermənistanda dislokasiya olunmuş 102-ci hərbi bazasının əsgərlərinin törətdikləri cinayətlərə qarşıdır.
102-ci hərbi bazanın qarşısında keçirilən piket 2015-ci il yanvarın 12-də bir erməni ailəsinin yeddi üzvünün qətlə yetirilməsinin ildönümündə təşkil olunub. Piket iştirakçılarının Ermənistan hökuməti, Rusiyanın Ermənistandakı səfirliyi və hərbi bazanın komandirinə ünvanlanmış müraciətində deyilir ki, 1999-cu ildən bəri rus hərbçilərinin törətdikləri cinayətlər nəticəsində Ermənistanın 12 vətəndaşı ölüb, 14 nəfər yaralanıb.
Ümumiyyətlə, son zamanlar erməni cəmiyyətində Rusiyaya qarşı narazılıqlar artıb. Sarkisyan rejiminin devrilməsindən sonra Nikol Paşinyanın yürütdüyü siyasətin Rusiya dövlətinə zidd olduğu bəllidir. Bu səbəbdən Ermənistanda Rusiya rejiminə qarşı etirazlar günü-gündən artmaqdadır.
Baş verənləri "Şərq”ə dəyərləndirən "Atlas” Araşdırmalar Mərkəzinin sədri, politoloq Elxan Şahinoğlu bildirib ki, Ermənistanın tamamilə Rusiyadan asılı olması mövcud durumu daha da gərginləşdirir:
"Ermənilər görürlər ki, Rusiyanın vassalı, hətta qulu olmaqlarına rəğmən bu onlara elə də xeyir gətirmir. Azərbaycan torpaqlarını geri almaq siyasətini davam etdirir və ermənilər düşünürlər ki, niyə Rusiya buna mane olmur? Bütün bu faktlar və Rusiya hərbiçilərinin Ermənistanda törətdikləri qətllər erməni cəmiyyətində narahatçılıq doğurur. Ermənistanın indiki baş naziri Nikol Paşinyan da Rusiya ilə münasibətlərində ancaq soyuqluq yaşayır. Ona görə də zaman-zaman erməni cəmiyyətində Rusiyaya qarşı olan narazılıq qısa müddətdə özünü göstərdi. Ermənilərin çoxu Rusiya ilə üz-üzə gəlmək istəmirlər. Rusiyanın ermənilərdən heç bir razılığı yoxdur. Niyə də olsun? Ermənistan Azərbaycanla düşmən olub, torpaqlarımızı işğal edib və Türkiyə ilə düşməndir. Belə vəziyyətdə ermənilər düşünürdülər ki, Rusiya onları xilas edəcək. Amma Rusiyanın onları xilas etmək fikri yoxdur”.
Politoloq bildirib ki, Rusiya erməniləri asılı vəziyyətdə saxlamaqla onları idarə etmək istəyir. Məhz buna görə də erməni cəmiyyəti reaksiya verir və öz fikirlərini bildirir:
"Hətta Rusiyanın Ermənistandan çıxıb getməsi üçün şüarlar da yaradırlar.
Düşünmürəm ki, Rusiya asanlıqla Ermənistandan çıxıb getsin, yaxud hərbi bazasını ləğv etsin. Ermənilərin əksəriyyəti isə qorxur ki, Rusiya Ermənistandan çıxsa, onlar təkbaşına Azərbaycan və Türkiyə ilə bacara bilməyəcəklər. Həqiqətən də bu belədir. Əslində Rusiya ortada olmasaydı, biz ermənilərlə məsələni çoxdan həll etmişdik. Çox təəssüf ki, Rusiyadakı müəyyən güclər buna mane olur.
Həmin güclər ki, Mariya Zaxarovanın dili ilə bizə mesajlar göndərirlər. Ona görə də ermənilərin bir hissəsi düşünür ki, "Rusiyadan narazılığımız olsa da, qul olaraq qalmalıyıq ki, Azərbaycan torpaqlarını işğal altında saxlaya bilək”. Məhz buna görə erməni cəmiyyətində ikibaşlılıq yaranır. İnsanların bir qismi deyir ki, "Rusiyanın qulu olmağa davam etməliyik”. Digər qism isə düşünür ki, "Rusiyanın qulu olduq, amma heç bir qazancımız olmadı”. Erməni cəmiyyəti bu iki ziddiyət arasında vurnuxur. Baş verən hadisələrin də əsas səbəbi budur”.
Yeganə Bayramova
