"Ermənistan silahlı qüvvələrinin son günlər dövlət sərhəddinin Qazax istiqamətində və təmas xəttində atəşkəsi mütəmadi pozması Paşinyanın danışıqlar prosesində uzaqlaşmaq cəhdi ola bilər”.
Bunu "Sherg.az”a açıqlamasında Cənubi Qafqaz Sülh və Münaqişələrin Həlli Mərkəzinin rəhbəri Məhəmməd Əsədullazadə deyib.
Analitik bildirib ki, Paşinyanın konfliktin həllində real imkanları aşağı səviyyədədir:
"Azərbaycan tərəfi ilə şifahi razılaşması oldu və bir müddət cəbhədə nisbi sakitlik hökm sürdü. Ancaq görünür, Azərbaycanın ona verdiyi şansdan sui-istifadə edərək, parlament və digər icra strukturlarında mövqeyini möhkəmləndirdikdən sonra danışıqlardan yayınmağa cəhd edir. Məsələ ondadır ki, Paşinyanın avantürası yenidən aprel eskalasiyasının təkrarlanmasına gətirə bilər. Bu da Paşinyanın siyasi fiaskosu olar.
Hazırda Paşinyanın Rusiya ilə qaz məsələsində anlaşma istədiyinə nail ola bilməməsi, islahatların reallaşmasında çətinliklər yaşaması daxili narazılıqları körükləyir. Bir tərəfdən də Qarabağ münaqişəsinin həllində imkanları dəyərləndirməməsi baş naziri dilemma qarşısında qoyur. Erməni ordusunda Rusiya kəşfiyyatına bağlı generallar hər vəchlə cəbhədə təxribata gedə bilərlər. Bununla onlar danışıqlar prosesini sıfırlamağa çalışırlar. Nə qədər ki, Paşinyan orduda həmin generalları deşifrə etməyib, Qarabağ klanını tam zərərləşdirməyib, onun danışıqlarda müstəqil şəkildə qərar verməyi mümkün olmayacaq. Bir tərəfdən də Rusiya da danışıqlarda əsas vasitəçi olaraq qalmaqdadı”.Siyasi şərhçinin sözlərinə görə, Kreml münaqişənin həllinə regional rakursundan yanaşır:
"Moskva "3+2” formatında həll variantını irəli sürür. Qarabağa aralıq statusu verilməsini önə çəkir. Bununla bərabər öz sülhmərmlı qüvvələrini Xankəndində yerləşdirməyi planlayır. Bu, variant təbii ki, Azərbaycanın maraqlarına uyğun deyil. Ermənistan və Azərbaycan XİN rəhbərlərinin növbəti danışıqları gözlənilir. Danışıqların detalları barədə məlumat verilməsə də, hər halda Azərbaycan tərəfi ərazi bütövlüyünə qarşı hər hansı bir danışıqlara getməz.
Münaqişə ətrafında əsas proses aprel ayından sonra başlayacaq. İl ərzində intensiv danışıqlarda Rusiyada iştirak edəcək. Problem ondan ibarətdir ki, Moskvanın irəli sürdüyü şərtlər danışıqlara mənfi təsir edəcək. Bu da il ərzində danışıqlar ssenarisinin davam etməsinə xidmət edə bilər. Məhz rəsmi Bakı bu kimi ssenarilərin qarşısın almağa çalışacaq”.
İsmayıl
