"Fransa ermənipərəst dövlət kimi tanınır. 500 ildir ermənilər Fransada kök salıb”.
Bunu "Sherg.az”a açıqlamasında millət vəkili Elman Məmmədov deyib.
Deputat bildirib ki, Fransanın bütün siyasətində və maliyyəsində ermənilər mühüm rol oynayır: "Hələ Birinci Dünya Müharibəsi dövründə Türkiyəni işğal edən fransız ordusunun tərkibində 30 minlik erməni legionu var idi. İllər keçdikcə ermənilər soyadlarını dəyişib "fransız”laşıblar. Hələ bilmək olmaz ki, Fransa rəhbəri özü ermənidir, yoxsa əsl fransızdır, ancaq bir şeyi dəqiq bilirik ki, Makron üç gün Ermənistanda qalıb və Paşinyanla səmimi görüşlər keçirib.
Mən o zaman dedim ki, Makron öz evinə, kiçik qardaşlarına baş çəkməyə gəlib. Ondan əvvəlki prezident Sarkozi Ermənistanı "kiçik bacı” adlandırmışdı. Yəni Fransanın ermənipərəst mövqe sərgiləməsi hamıya bəllidir. Xatırlayırsızsa, Fransa bir müddət əvvəl qərar qəbul etmişdi ki, əgər kimsə qondarma erməni "soyqırımı”nı tanımasa, cərimələnəcək. Həmin siyasət bugün də davam etdirilir. Lakin bizi məyus edən məqam odur ki, həmin Fransa Dağlıq Qarabağ münaqişəsinin həllində həmsədr rolunda çıxış edir”.
Parlament üzvünün sözlərinə görə, Fransa vasitəçi ola bilməz, çünki vasitəçi tərəfsiz olmalıdır:
"Fransa bütün müstəvilərdə erməniləri müdafiə edir. Əslində rəsmi Parisin həmsədrlik məsələsinə çoxdan baxılmalı idi. Şəxsən 20 ilə yaxındır təklif edirəm ki, nəinki Fransa, ümumiyyətlə üç vasitəçi dövlətin hamısı həmsədrlikdən uzaqlaşdırılsın. Çünki hər üç ölkə birmənalı şəkildə ermənilərə dəstək verir. Bunu gizlətməyin nə faydası var? Həqiqəti açıq söyləmək lazımdır. Axı Minsk Qrupu sadəcə üç dövlətdən ibarət deyil, orada 10-dan çox ölkə var.
Digər dövlətlər də həmsədr ola bilər. Niyə taleyimiz ermənipərəst üç ölkənin ümidinə qalmalıdır?! Türkiyə prezidenti hörmətli Ərdoğanın yaxşı sözü var, deyir ki, "dünya beşdən böyükdür”. Yaxşı olar ki, mandatı ATƏT-dən alıb BMT-nin Təhlükəsizlik Şurasına versinlər”.
İsmayıl
