Dövlət Gömrük Komitəsi (DGK) sahibkarlara müraciət edib. Müraciətdə deyilir ki, dövlət başçısının sahibkarlar üçün daha əlverişli şəraitin yaradılmasına dair göstərişlərini nəzərə alaraq DGK gömrük bəyannamələrinin tərtib edilməsinə görə xidmətlərə 70 faiz güzəşt tətbiq edilməsi haqqında qərar qəbul edib.
Bu səbəbdən gömrük bəyannamələrinin tərtib edilməsinə görə xidmət haqqı 50 AZN-ə (ƏDV daxil deyil) endirilib”.
DGK-nin qərarını şərh edən tanınmış iqtisadçı Nazim Məmmədov "Şərq”ə bildirib ki, bunların hamısı gözdən pərdə asmaq məqsədi daşıyır: "Yanılmıramsa, əvvəllər gömrük bəyannaməsinin xidməti haqqı təqribən 16 manat idi. Adətən, xidmət haqları 1 faiz üzərindən olmur. Yəni 70 faiz güzəşt etməklə sahibkarların fəaliyyətinə və cənab Prezidentin danışdıqlarına kölgə salırlar. Bu addımın bazarda hansısa dəyişikliyə səbəb olacağını düşünmürəm. Bu, xərclərin də azalmasına gətirib çıxarmaycaq. Çünki xırda xərclərdir. Əslində atılmalı olan addımlar DGK-nin strukturlarının dəyişdirilməsi, ləğvi, monopoliyanın tamamən aradan çıxarılması və gömrükdə toplanan ƏDV- nin, rüsumların vahid hesaba yığılmasıdır. Bundan başqa, DGK Vergilər Nazirliyinə birləşdirilməsi daha məqsədəuyğun olar. 70 faiz güzəşt sahibkarlara hər bəyannamədən 5-6 manat dəstək deməkdir. Bu gözə kül üfürməkdən başqa bir şey deyil”.
Ayyət Əhməd
