"Gürcüstanda daşınmaz əmlak sahibi olan azərbaycanlıların artmasının ilk səbəbi orada mülkiyyət toxunulmazlığının dövlət tərəfindən ciddi şəkildə qorunmasıdır”.
Bu barədə "Sherg.az”a iqtisadçı-ekspert Qadir İbrahimli bildirib.
Onun fikrincə, qonşu ölkə Azərbaycana yaxın olduğundan orada biznes qurmağa çalışan, daşınmaz əmlak alan azərbaycanlıların sayı artıb:
"Azərbaycanla kommunikasiya imkanları yaxın olan Gürcüstanın iqtisadi inkişafı biznesmenləri və sıravi vətəndaşları cəlb edir. Bu ölkəyə biznes qurmaq üçün müraciət edən şəxslərin imkanları genişdir. Xüsusilə, rəqabət mühiti şəraitində keyfiyyətli iş ortaya qoymağı bacaran azərbaycanlı biznesmenlər Gürcüstanda uğur qazana bilirlər. Müraciət edən şəxslərin az qala yarısı bu rəqabətli şəraitdə öz uğurlu biznesini qurmağı bacaracaqdır”.
Qeyd edək ki, 2012-2016-cı illərdə Gürcüstanda daşınmaz əmlak alan xarici ölkə vətəndaşların 53 faizini Rusiya vətəndaşları təşkil edirlər. Bu siyahıda rusiyalılardan sonra ikinci sırada hər biri 5 faizlə Azərbaycan, Ukrayna və Ermənistan vətəndaşları dayanırlar. Gürcüstanda daşınmaz əmlak alanların 4 faizini İsrail, 3 faizini ABŞ və Yunanıstan, 2 faizini isə Almaniya vətəndaşları təşkil edirlər.
Aysel Aslan
