"Bu yaxınlarda Nazirlər Kabineti tələbə təqaüdlərinin verilməsinin yeni qaydalarını təsdiq edib”. Bu barədə Təhsil Nazirliyinin Elm və ali təhsil şöbəsinin müdir müavini Natiq İbrahimov bildirib.
Qurum rəsmisinin sözlərinə görə, artıq sənəd icradadır və yerlərə göndərilib: "Bu semestrdən başlayaraq həm dövlət sifarişli yerlərdə oxuyan, həm ödənişli əsaslarla təhsil alan tələbələr təqaüd almaq imkanı qazanıblar. Qaydalara müvafiq olaraq, hər bir ali təhsil müəssisəsində ixtisas üzrə dövlət sifarişinə qəbul olunanların sayı həcmində təqaüd müəyyənləşib. Bir universitetdə ola bilər təqaüd azdır, o birisində çoxdur. Bu, dövlət sifarişi ilə təhsil alanların sayı
ilə müəyyənləşir. Sənəd təxminən hər il 12 minə yaxın tələbəni əhatə edəcək. Bakalavr səviyyəsində hər kurs üzrə 11 mindən çox tələbənin təqaüd almaq imkanı yaranacaq. Eyni zamanda, yeni qaydalar magistr pilləsində hər kurs üzrə 2 mindən çox tələbəni əhatə edəcək”.
Qərarı dəyərləndirən Azərbaycan Təhsil Şurasının sədri, təhsil eksperti Əjdər Ağayev "Şərq”ə söyləyib ki, bu, işin xeyrinə olan addımdır. Ona görə ki, artıq tələbə hüquqları bərabər tutulacaq: "Yaxşı oxuyub, imtahanları əla qiymətlərlə başa vuran tələbənin ödənişli və ödənişsiz əsaslarla təhsil almasının heç bir fərqi yoxdur. Tələbənin intellektual səviyyəsi yüksəkdirsə, təqaüd almalıdır. Artıq sərəncam verilib. Çox mütərəqqi və inkişafa yönəlik işlərdir. Daha tələbələr üzərlərində həvəslə işləyəcəklər. Dərslərinə yaxşı hazırlaşacaqlar. Bir sözlə, məlum qərar tələbələr üçün stimul rolunu oynayacaq. Həm bilik mənimsəyəcəklər, həm də nəticələri yüksək dəyərləndiriləcək. Bunu çox yüksək qiymətləndirirəm. Arzu edirəm ki, bütün sahələrdə çalışanların zəhməti yüksək dəyərləndirilsin”.
Ayyət Əhməd
