Azərbaycan Dövlət Neft Şirkəti (SOCAR) bir neçə ərazidə böyük şəhərciklər salmaq üçün razılıq alıb. Bu barədə qurumun prezidenti Rövnəq Abdullayev Bakı Biznes Mərkəzində gənc neftçilərlə görüşdə məlumat verib. O qeyd edib ki, məsələyə dair Azərbaycan Prezidenti İlham Əliyevlə müzakirə aparılıb və razılıq alınıb.
R.Abdullayev Qaradağ, Pirallahı və şirkətin torpağı olan digər ərazilərdə kooperativ tikintilər, böyük şəhərciklər salınacağını bildirib. Onun sözlərinə görə, proqramın icrasına gələn həftədən başlanılacaq: "Bütün neftçi gəncləri evlə təmin etməyə çalışacağıq və proqram gələn həftədən başlanacaq. Artıq SOCAR-ın bir neçə idarəsinə tapşırılıb və hazırlıq işləri görülür. Hər idarəyə imkan yaradılacaq ki, torpaq sahəsi götürsün”. Həmçinin R.Abdullayev qeyd edib ki, neftçilər təqdim olunacaq uzunmüddətli kreditlər üzrə əmək haqqından tutulmaqla ödəniş həyata keçirəcəklər.
Neftçilərin Hüquqlarını Müdafiə Komitəsinin sədri Mirvari Qəhrəmanlı”Şərq”ə deyib ki, bunu R.Abdullayev iki il əvvəl desə idi, inanmaq olardı: "Birincisi, ARDNŞ heç kimə pulsuz mənzil verməyəcək. Çünki indi Sovet vaxtı deyil. Əlbəttə, neftçilərə evlərin verilməsi yaxşı hal olardı. Amma bu real görünmür. Ona görə ki, ölkədə böhran yaşanır. Yəni arzu imkanlarla uzlaşmayanda gerçəkləşmir. Buna böyük məbləğdə vəsait lazımdır. Böhran aradan qalxmayana qədər R.Abdullayevin arzusu reallaşmayacaq. Sözügedən müəssisənin qarşısında həllini gözləyən kifayət qədər problem var. Buna misal olaraq "Günəşli” yatağını göstərə bilərik. Bu platformada baş verən yanğın nəticəsində ölkəyə ciddi ziyan dəydi. Doğrudur, burada ən böyük ziyan insan tələfatıdır. Bundan sonra iqtisadi zərərdir. ARDNŞ vəziyyətini düzəltmək üçün köhnə yataqlara sərmayə qoyulmalıdır. Bir daha qeyd edirəm ki, R.Abdullayevin fikirləri və təklifləri müsbət olsa da, bu vədin gerçəkləşməsi böhran ötüşəndən sonra başlanıla bilər. Allah eləsin proqnozlarım səhv olsun. Amma mənə elə gəlir ki, gənclər orta yaşlarına çatanda həmin evləri alacaq”.
M.Qəhrəmanlı qurumdakı ixtisarlardan da söz açıb: "Hər il ARDNŞ maliyyə durumuna, hasil etdiyi neftin miqdarına və qiymətinə uyğun olaraq ixtisarlar aparırdı. Bu il isə ixtisarlar ölkə başçısının tapşırığı ilə müvəqqəti olaraq saxlanılır”.
Ayyət Əhməd
