Ötən gün bəzi informasiya portallarında "Həftə içi” qəzetinin və "hafta.az” saytının işçilərinin ixtisar edilməsi və adıçəkilən mətbu oqranların bağlanması barədə dezinformasiyalar yayılıb.
Texniki səbəblərdən saytlarda gedən həmin yanlış məlumat qəzetimizdə də dərc olunub. Yayılan xəbərlərlə bağlı mətbuata açıqlama verən "Həftə içi” qəzetinin baş redaktoru Sevinc Seyidova qəzetin bağlanması xəbərini təkzib edib. Hazırda iş başında olduğunu deyən baş redaktor deyib ki, məlum maliyyə problemləri ilə əlaqədar qəzetdə ixtisarlar ola bilər, lakin bu, qəzetin tam bağlanması anlamına gəlmir: "Qəzet 4 səhifəlik də olsa, fəaliyyətini davam etdirir. "Həftə içi”nin bağlanacağı ilə bağlı yayılan məlumatlar doğru deyil. Çap xərclərinin artması ilə bağlı mətbuat orqanının səhifələri müvəqqəti olaraq azaldılıb. Xüsusi olaraq vurğulamaq istərdim ki, bu vasitəyə tək "Həftə içi” qəzeti yox, ölkənin bir sıra tanınmış gündəlik mətbuat orqanları da əl atıblar. Problem təkcə bizə aid deyil. Bütün çap mediası hazırda bu vəziyyətdədir”. Baş redaktor bildirib ki, işdən çıxarıldığı bildirilən əməkdaşlardan Vüsal Tağıbəyli, Sevinc Osmanova, Qələndər Xaçınçaylı redaksiyadadırlar və öz fəaliyyətlərini davam etdirirlər: "Digər əməkdaşımız Tural Turan isə səhhətində yaranmış problemlərlə bağlı bir aylıq müalicə üçün icazə alıb. Yalnız bir-iki əməkdaşımızın fəaliyyətinə son qoyulub ki, bu da qəzetin və saytın normal rejimdə fəaliyyət göstərməsinə heç bir təsir göstərməyib”.
İsmayıl
