Tanınmış jurnalist İmdad Əlizadənin atası, yazıçı-publisist Əli Əliyevi "Koroğlu” metrostansiyası yaxınlığında yolu keçərkən avtomobil vurub. Ağır kəllə-beyin travması alan 70 yaşlı Əli Əliyev Bakıdakı 1 saylı Şəhər Klinik Xəstəxanasının ("Semaşko”) reanimasiya şöbəsinə yerləşdirilib.
Əli Əliyevin vəziyyəti ilə bağlı oğlu İmdad Əlizadənin özü ilə əlaqə saxladıq. "Şərq”ə danışan jurnalist atasının vəziyyətinin əvvəlki kimi ağır olaraq qaldığını deyib: "Həkimlər atamın vəziyyəti ilə bağlı irəliləyişin olmadığını deyir. Dərin komada süni nəfəs aparatına qoşuludur. Onu fevralın 22-də, axşam saatlarında Mərkəzi Klinik Xəstəxanaya köçürmüşük. Bundan əvvəl 1 saylı Şəhər Klinik Xəstəxanasının ("Semaşko”) reanimasiya şöbəsində yerləşdirilmişdi, orada da komada idi. Həkimlər Mərkəzi Klinik Xəstəxanada yenidən müayinə ediblər, vəziyyəti hələ ki, ağırdır”.
İmdad Əlizadənin sözlərinə görə, hadisənin baş verməsindən 10 gün keçməsinə baxmayaraq, Ə.Əliyev xəstəxanaya necə daxil olubsa, indi də eyni vəziyyətdədir: "Həkimlərin gözlədiyi daxili orqanlardakı fəsadlar artıq özünü göstərməyə başlayıb. Mərkəzi Klinik Xəstəxanada ağır kəllə beyin travması və beyin kötüyünün zədələnməsi diaqnozu qoyuldu. Ayağının baldır hissəsində yerini dəyişmiş qəlpəli sınıqlar var. Mərkəzi Klinik Xəstəxanada edilən tomoqrafik müayinə zamanı qabırğasının da sındığı bilindi. Həkimlər yalnız gözləməyi məsləhət bilirlər. Dəqiq bir söz, proqnoz deyə bilmirlər”.
Aysel Aslan
