"Milli Strateji Düşüncə Mərkəzinin sədri, Müsavat Partiyasının sabiq başqanı İsa Qəmbərin yanında olan insanlar onun səhhətinin normal olduğunu deyir”.
Bu barədə "Sherg.az”a Müsavat Partiyası başqanının müavini Gülağa Aslanlı məlumat verib. O bildirib ki, partiya lideri yataqda deyil. Hər gün az da olsa, gəzintiyə çıxır:
"Müayinə və müalicələr isə davam edir. Yaxınlarının sözlərinə görə, həftənin sonunda həkimlər İsa Qəmbərin səhhəti ilə bağlı dəqiq məlumat verəcəklər”.
G.Aslanlının sözlərinə görə, İ.Qəmbərin ürəyində yaranmış problemlə bağlı Bakıda götürdüyü müalicə effektiv olmayıb:
"Başqanın ürəyində yaranmış problemi aradan qaldırmaq üçün asılan sistemlər, verilən dərmanlar nəticəsində onun səhhətində yeni problemlər üzə çıxdı. Ona görə, İsa bəyin Almaniyaya getməsinə ehtiyac yarandı”.
Qeyd edək ki, yanvarın 13-də İ.Qəmbərin səhhətində problem yaranıb və Mərkəzi Klinikaya yerləşdirilib. Orada İ.Qəmbərin ürəyinə stentlər qoyulub. O, fevralın 23-də yenidən Mərkəzi Klinikaya aparılıb.
Daha sonra isə İ.Qəmbər Müsavat Partiyasının başqanı Arif Hacılının və Mərkəzi Klinik Xəstəxanasının həkiminin müşayiəti ilə Türkiyənin paytaxtı Ankara şəhərindəki "Hacettepe” xəstəxanasına yerləşdirilib. O, "Hacettepe” xəstəxanasından martın 14-də buraxılıb və Bakıya qayıdıb.
İ.Qəmbər müalicəsini davam etdirmək üçün aprelin 4-də Almaniyaya gedib. Hazırda orada müalicə alır.
Aysel Aslan
