Azərbaycanın sabiq xarici işlər naziri Tofiq Zülfüqarov yol-nəqliyyat hadisəsi törətməsi barədə yayılan məlumatlara aydınlıq gətirib.
Bu barədə APA-ya açıqlama verən sabiq nazir qeyd edib ki, o, bu hadisədə şahid qismində istintaqa cəlb olunub:
"Yayılan məlumatlar həqiqətə uyğun deyil. Həmin şəxs yolu keçərkən sərxoş vəziyyətdə olub. Hadisə baş verən ərazidən 10 metr kənarda yerüstü piyada keçidi var. Lakin piyada həmin keçiddən istifadə etməyib. Ölən şəxs içkili vəziyyətdə avtobusdan düşərək səkkiz zolaqlı yolu qaçmağa başlayıb. Bu zaman avtomobilimin yan güzgüsünə dəydi. Sonradan isə digər maşın onu vuraraq öldürdü. Bütün bunları əks etdirən görüntülər də var. Mən də polisə şahid qismində ifadə verdim. Hər şeyi olduğu kimi danışdım”.
T. Zülfüqarov həmçinin qeyd edib ki, o, qayda pozuntusuna yol verməyib: "Məni tibbi müayinədən də keçirdilər. Mən nə sərxoş olmuşam, nə də sürət həddini aşmışam”.
Qeyd edək ki, Daxili İşlər Nazirliyi məlum yol qəzası ilə bağlı sentyabrın 15-də məlumat yayıb. Məlumatda qeyd olunur ki, sentyabrın 14-də saat 19 radələrində Xətai rayonunun Zığ yolu küçəsində Bakı şəhər sakini Rasim Əsgərov idarə etdiyi "Ford” markalı avtomobillə yolu keçən İmişli rayon sakini Uğur Vəliyevi vurub və nəticədə piyada hadisə yerində ölüb. Bu gün isə mətbuatda piyadanın T. Zülfüqarov tərəfindən vurulması barədə məlumat yayılıb.
**
12:46
2 gün əvvəl Xətai rayonu ərazisində baş vermiş yol qəzası ilə bağlı yeni məqam üzə çıxıb. Lent.az Report-a istinadən xəbər verir ki, piyada Uğur Vəliyev ölümü ilə nəticələnən yol qəzasında Azərbaycanın keçmiş xarici işlər naziri Tofiq Zülfüqarovun idarə etdiyi "Mercedes” markalı avtomobilin iştirak etdiyi məlum olub. Belə ki, sabiq nazirin maşınının yan güzgüsü piyadaya dəyib və o daha sonra Rasim Əskərovun idarə etdiyi "Ford” markalı yük maşınının qarşısına düşüb. Piyada hadisə yerində ölüb.
Məsələ ilə bağlı T.Zülfüqarovdan münasibət öyrənmək mümkün olmayıb.
*****
15 sentybar 9:40
Bakıda ölümlə nəticələnən yol qəzası baş verib. Lent.az xəbər verir ki, dünən saat 20 radələrində Xətai rayonu Zığ yolunda "Ford" markalı, 90 HU 342 dövlət qeydiyyat nişanlı avtomobil yolu keçməyə çalışan 66 yaşlı kişini vurub. Ağır xəsarət alan piyada hadisə yerində vəfat edib.
Faktla bağlı Xətai rayon Polis İdarəsində cinayət işi açılıb, araşdırma aparılır.
