"Gürcüstan Prezidenti Salome Zurabaşvilinin "Keşikçi Dağ” məbəd kompleksi ilə bağlı iddialarının arxasında oliqarx Bidzina İvanaşvili durur”.
Bunu "Sherg.az”a açıqlamasında Cənubi Qafqaz Sülh və Münaqişələrin Həlli Mərkəzinin rəhbəri Məhəmməd Əsədullazadə deyib. Analitik bildirib ki, İvanaşvili öz hakimiyyətinin ilk günlərindən başlayaraq iki ölkənin möhkəm strateji əməkdaşlığına zidd olaraq dövlətimizə qarşı siyasi-iqtisadi sabotajlara əl atırdı, bəyanatlar verirdi:
"Hazırda ölkəmizə qarşı davam edən bu avantürist siyasət İvanaşvili iqtidarının növbəti seçkidə fiaskosuna gətirəcək. İvanaşvili bu siyasəti ilə ölkəsində azərbaycanlılara qarşı ayrı-seçkiliyi tətikləyir. Lakin bu cür siyasət Gürcüstan dövlətçiliyinin zəifləməsinə və parçalanmasına gətirə bilər.
Acarıstan potensial olaraq Türkiyənin nəzarətindədir və istənilən situasiyada Gürcüstandan ayrıla bilər. Ona görə də İvanaşvili iqtidarı erməni və rus avantürasına gedərək, anti-Azərbaycan və anti-Türkiyə siyasəti ilə ölkəsini zəif duruma gətirir. Verilən bəyanat və qərarlarda Kremlin təsiri görünür. Görünür, rəsmi Tiflislə Moskva arasında konfedensial diplomatik danışıqlar gedir”.
Siyasi şərhçi bildirib ki, dövlət komissiyası aparılacaq danışıqlarda "Keşikçi Dağ” məbəd kompleksini qəti şəkildə Azərbaycanın nəzarətində saxlamalıdır:
"Gürcüstana bir qarış da torpaq güzəştə getmək danışıqlar predmeti ola bilməz. Mütləq şəkildə növbəti seçkilərdə Gürcüstan azərbaycanlıları ilə sıx işləmək lazımdır. Ötən parlament seçkilərində Bakıdan bir qrup nümayəndə Borçalıya gedərək İvanaşvilinin "Gürcü Arzusu” partiyasından olan üzvlərin seçilməsinə dəstək verdilər. Halbuki, həmin dairədən azərbaycanlı namizəd qalib gəlmişdi. Nəticə isə göz qabağındadır. Ona görə də mütləq şəkildə Gürcüstan azərbaycanlılarını siyasi cəhətdən aktivləşdirmək lazımdır. Siyasi partiya yaradıb, Gürcüstan siyasətinə inteqrasiya edilməlidir”.
İsmayıl
