"Demək olar ki, sənaye məhsullarının bütün seqmentində bu problemlər var. Bizdə biznes adamları üçün çox yaxşı şərait yaradılıb. Amma təəssüflər olsun ki, bəziləri bundan sui-istifadə edir"
Bakının məşhur brend mağazası kimi tanınan "Lady Sharm”da hüquq-mühafizə orqanı əməkdaşları tərəfindən əməliyyat keçirilib. Çində istehsal olunan aşağı keyfiyyətli paltarların etiketləri "Lady Sharm”ın gizli sexlərində dəyişdirilib. Həmin paltarlara "Chanel”, "Fendi”, "Dolce& Gabanna”, "Valentino” və digər dünyaca məşhur brendlərinin saxta etiketləri tikilərək dəyərindən dəfələrlə baha qiymətə mağazalarda müştərilərə təqdim edilib. "Lady Sharm”ın fəaliyyət göstərən 12 mağazasında yoxlama aparılan zaman etiketləri dəyişdirilən saxta geyim əşyaları və xəz-dəri məhsulları aşkar edilərək maddi sübut kimi götürülüb.
"Lady Sharm” mağazalar şəbəkələri ilə bağlı hər ay rəhbərlik etdiyi quruma çoxsaylı şikayətlər daxil olduğunu vurğulayan Azad İstehlakçılar Birliyinin (AİB) sədri Eyyub Hüseynov "Lady Sharm” mağazalar şəbəkəsini bugünədək ifşa edə bilməməsində özünü günahkar hiss edib: "Gərək bu günə kimi "Lady Sharm” mağazalar şəbəkəsinin qanunsuz əməllərini ifşa edərdim. Onlarla bağlı bizə daxil olan şikayətləri danışıq yolu ilə həll edə bilməmişik və əksinə, bizə kobudluq edirdilər. Təəssüflər olsun ki, bu barədə dəfələrlə İqtisadiyyat Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidmətinə məlumat versək də, nədənsə, onlar heç bir iş görmür, onları cəzalandırmırdılar. Daxili İşlər Nazirliyinə təşəkkürümü bildirirəm ki, uzun illərdən sonra bu biabırçılığın üstünü açdı”.
AİB sədrinin dediyinə görə, Azərbaycanda, xüsusən Bakıda "Lady Sharm” mağazalar şəbəkəsindən başqa, digər məşhur brendlər adı altında da saxta məhsullar satan mağazalar var:
"Sahil" metrosunun yaxınlığında "Birə-bir” geyim mağazası var. Bir il bundan əvvəl ora ilə bağlı şikayət daxil olub. Ən məşhur brendlər adı altında saxta məhsullar satırlar. Ayaqqabı biznesində çox ciddi problemlər var. Demək olar ki, sənaye məhsullarının bütün seqmentində bu problemlər var. Bizdə biznes adamları üçün çox yaxşı şərait yaradılıb. Amma təəssüflər olsun ki, bəziləri bundan sui-istifadə edir. Mən dəfələrlə demişəm, MDB (Rusiya, Ukrayna və digər) ölkələrində reketlər gəlib biznesmenlərin əlindən pullarını, qazanclarını alırlar. Azərbaycanda isə bu yoxdur. Lakin biznes qurumları bunu qiymətləndirə bilmirlər”.
Xatırladaq ki, Daxili İşlər Nazirliyi "Lady Sharm” mağazalar şəbəkəsinin vəzifəli şəxslərinin cinayət işinə cəlb olunması barədə açıqlama yayıb. Daxil olan çoxsaylı şikayətlər əsasında paytaxt və bölgələrdə fəaliyyət göstərən "Lady Sharm” mağazalar şəbəkələrində, həmin mağazaların anbarlarında keçirilən əməliyyat zamanı çoxsaylı qanun pozuntuları, istehlakçıların hüquqlarının kobud şəkildə pozulması və müştərilərin aldanılması halları aşkar edilib.
Şəymən
