"Ermənistan və Azərbaycan masa arxasına oturmalı və Dağlıq Qarabağ münaqişəsini vasitəçi olmadan həll etməlidir”. Bunu Belarus Prezidenti Aleksandr Lukaşenko Ermənistanın Belarusdakı səfiri Armen Xaçatryanla görüşündə deyib.
O bildirib ki, məsələnin həlli ilə münaqişə tərəfləri məşğul olmalıdır: "Bizim edə biləcəyimiz heç nə yoxdur. Mövqeyimiz bundan ibarətdir ki, Ermənistan və Azərbaycan heç bir vasitəçi olmadan məsələni özləri həll etməlidir. Əgər onlar kimisə zamin kimi görmək istəyirlərsə, buna da özləri qərar verməlidir”. Belarus liderinin sözlərinə görə, insanların həlak olmasından və yoxsulluqdan əziyyət çəkməsindən siyasətdə vasitə kimi yararlanmaq olmaz.
Lukaşenkonun təklifi ilə bağlı "Şərq”ə danışan politoloq Arzu Nağıyev deyib ki, Belarus Prezidenti masa arxasında sadəcə münaqişə tərəflərinin olmasını nəzərdə tutur. Ekspertin fikrincə, Lukaşenko danışıqlarda üçüncü tərəfin, yəni separatçı rejimin yer almasının doğru olmadığına diqqət çəkmək istəyir:
"Son vaxtlar ermənilər çox cəhd göstərdilər ki, Dağlıq Qarabağdakı terrorçu rejimi tərəf kimi danışıqlar masasına əyləşdirsinlər. Bu aspektdən Belarus rəhbərinin məsələyə yanaşması müsbət dəyərləndirilməlidir. İki dövlət arasında mövcud olan konflikt heç bir halda üçüncü tərəfin iştirakı ilə həll edilə bilməz. Bu mümkün də deyil”. Ekspert bildirib ki, son zamanlar ATƏT-in Minsk Qrupunun verdiyi bəyanatlar deklorasiya xarakteri daşıyır: "Lukaşenko həmsədr dövlətlərin öz mənafelərinin ön planda olmasına da diqqət çəkib. Vurğulayıb ki, müxtəlif dövlətlərin məsələyə münasibəti də fərqli olur. Şübhəsiz ki, burada əsas və həlledici məsələ Azərbaycan və Ermənistandan asılıdır. Separatçıları və digər xarici dövlətləri münaqişəyə cəlb etmək olmaz. Çünki hər dövlət regional baxımdan öz maraqları çərçivəsində çıxış edir. Bu isə problemin həllini çətinləşdirir”.
İsmayıl
