"Orta məktəbi bitirən hansı şagird ilkin tibbi yardımı, özünü müdafiəni bacarır? Yolda hər hansı problem, xəsarət baş verərsə, orta məktəb məzunlarının heç biri ilkin tibbi yardım göstərə bilmir”.
Bunu "Sherg.az”a təhsil eksperti Kamran Əsədov deyib.
O bildirib ki, orta məktəblərdə keçdiyimiz dərslər həyat üçün deyil, statistik göstərici naminə tədris olunur:
"Fikirlər səsləndirilir ki, şəxsiyyət yönümlü tədris sistemi qurulub. Lakin buna zidd olaraq ən yaxşı məktəb təhsil göstəriciləri, qəbul nəticələri yüksək olan məktəb hesab edilir. Hansı məktəbi daha çox şəhid verdiyinə, igid əsgərlərin sayının çoxluğuna, ən yaxşı futbolçu yetişdirdiyinə, digər bacarıqlı şagirdlərinə görə tanıyırıq?
Hesab edirəm ki, ali məktəblərə qəbulu, tədris sistemini sadələşdirsək, şagirdlərin fiziki, psixoloji inkişafı ilə bağlı problemlər ortaya çıxmaz”.
Tədris prosesinin hələ də sovetlər dönəmin qalan mexanizmlərlə həyata keçirildiyini deyən ekspertin sözlərinə görə, ağır yüklü tədris qurulur:"Elə lazımlı fənlər var ki, onları qeyri-ciddi hesab edirik. Məsələn, idman dərsləri, musiqi, rəsm, peşə təlimi dərslərinin hazırlığı artırılmalıdır. Biz həyat üçün kadr hazırlamalıyıq.
Məntiq dərslərinin keçirilməməsi haqqında iradlar irəli sürülür. Bir məsələ var, söhbət riyazi məntiqdən getməlidir, yoxsa problemli situasiyadan çıxışı öyrətməliyik ? Riyaziyyatda ehtimal nəzəriyyəsi və s. kimi ağır akademik proqramlar keçirilir. Lakin problemli situasiyadan çıxış məntiqi mütləq orta məktəblərdə keçirilməlidir.
Hesab edirəm ki, tədris proqramlarında dəyişiklik etməliyik. Biologiya dərsliklərində biz insan orqanizmini deyil, insan orqanizminin özünü müdafiə qabiliyyətini öyrənməliyik. Uşaqlar həkimə gedəndə hansı orqanının ağrıdığını deyə bilmir. Çünki orqanların yerini bilmirlər. Uşaqlar qidalanma zamanı nələrə diqqət etmək lazım olduğunu bilmirlər, cinsi, fizioloji inkişaf haqqında elementar biliklərə malik deyil. Yuxarı sinifdə anatomiya kitablarında insanların çoxalmasına aid bölmə var. Müəllimlər həmin hissəyə çatdıqda dərsi keçmirlər.
Əslində isə bu məsələlər ciddi öyrənilməlidir. Sonra da deyirik ki, insanlarda niyə sonsuzluq, tibbi problemlər var. Biz cəmiyyət olaraq qorxuruq. Neqativləri düzgün idarə edib, yönləndirməsək cəmiyyətdə psixoloji və fizioloji inkişafdan geri qalma problemləri ortaya çıxacaq”.
Aysel Aslan
