"Prezident İlham Əliyev müşavirədə problemləri açıq şəkildə diqqətə çatdırdı və səlahiyyətli şəxslərdən məsuliyyət tələb etdi”.
Bunu "Sherg.az”a "Konstitusiya” Araşdırmalar Fondunun rəhbəri Əliməmməd Nuriyev bildirib.
O vurğuylayıb ki, müşavirədə çıxış edən məmurlar məlumatları heç də dolğun çatdırmadılar:
"Ölkə başçısının çıxışından da məlum oldu ki, müşavirə iştirakçılarının bəziləri rəhbərlik etdikləri qurumdan ümumiyyətlə xəbərdar deyillər və məlumat verə bilmirlər. Prezident məmurların bu addımına kəskin reaksiya göstərdi.
Səlahiyyətli şəxslər məsuliyyətdən yayınmaq üçün Mingəçevir İES-də baş verən qəzanı kənar faktorlarla əlaqələndirməyə çalışırdılar. Bu laqeydliyə irad bildirən ölkə başçısı faktları ortaya qoymaqla, sistemdə mövcud olan boşluqların aradan qaldırılması, təqsirkarların cəzalandırılması barədə tapşırıq verdi. Dünənki müşavirədə o da məlum oldu ki, rəhbər şəxslər rəhbərlik etdikləri sektorun əhəmiyyətini ciddi dərəcədə başa düşmürlər. Görünür, bu sahələrdə aparılan siyasətin yenilənməsinə ehtiyac var.Enerji təchizatının təmin olunmasında istifadə olunan avadanlıqların yenilənməsinə ehtiyac var. Yeni texnologiyaların gətirilməsində əhəmiyyətli işlərin görülməsinə ehtiyac duyulur. AMEA-nın Fizika institutunun direktoru Nazim Məmmədov müşavirədə çıxış etmək istəmədi. Bu da onu göstərir ki, vəziyyət həqiqətən ciddidir. Görünür, Mingəçevir İES-də baş verən qəzanın digər səbəbləri də var”.
Fövqəladə Dövlət Komissiyasının və Baş Prokurorluq tərəfindən yaradılan istintaq qrupunun məsələni ciddi araşdıracağını iddia edən Ə.Nuriyev vurğulayıb ki, hər iki təsisatın fəaliyyətinə peşəkar mütəxəssislər cəlb olunub:
"Yaranmış vəziyyət bu sahəyə nəzarət edən şəxslərin məsuliyyət məsələsini ortaya qoydu. Hesab edirəm ki, araşdırmaların nəticəsi olaraq, ayrı-ayrı şəxslərin vəzifəsindən azad olunması, hətta bəzilərinin cinayət məsuliyyətinə cəlb edilməsi təmin olunacaq. Məntiqlə düşündükdə, yaranmış vəziyyətə görə, məsuliyyət yüksəkdir. Ona görə, bütövlükdə bu sektordakı məsul şəxslər cəzalandırılmalıdır".
Qeyd edək ki, ötən gün keçirilmiş müşavirədə çıxış edən prezident İlham Əliyev ciddi araşdırmalar aparılacağını və yaranmış vəziyyətlə bağlı günahkarların məsuliyyətə cəlb ediləcəyini söyləyib. Prezident vurğulayıb ki, dünyanın hər bir ölkəsində heç kim qəzadan sığortalı deyil. Ancaq qəza lokal xarakter daşımalıdır:
"Bir stansiyada baş vermiş qəza bütün enerji sistemimizə çox böyük zərbə vurdu. Ona görə, elə bir tədbirlər planı hazırlanmalıdır ki, gələcəkdə biz bu qəzalardan və qəzaların törədə biləcəyi fəsadlardan özümüzü qoruya bilək”.
Aysel Aslan
