Gürcüstanın sabiq prezidenti, Odessa vilayətinin qubernatoru Mixail Saakaşvili mühafizəçilərdən imtina edib. Bu barədə o, öz "Facebook” səhifəsində yazıb. Qubernator qeyd edib ki, istəyi ilə bağlı Ukraynanın Təhlükəsizlik Xidmətinin rəhbəri Vasili Qritsaka məktub ünvanlayıb: "Mən heç kimdən və heç nədən qorxmuram və bundan sonra Odessada və bütün ölkə ərazisində mühafizəçilər olmadan hərəkət edəcəyəm”.
Məlumat üçün bildirək ki, M.Saakaşvilinin təhlükəsizliyini "Alfa” xüsusi dəstəsinin əməkdaşları təmin edirdilər.
Saakaşvilinin addımını şərh edən "Atlas” Araşdırmalar Mərkəzinin rəhbəri Elxan Şahinoğlu "Şərq”ə söyləyib ki, o, təvazökar insandır. Hətta bu təvazökarlıqlarını Gürcüstan Prezidenti olarkən də nümayiş etdirib: "Ola bilsin ki, iki məqsədi var. Birinci o ola bilər ki, təvazökarlığını göstərir. İkincisi isə odur ki, əlavə xərc olmasın və bütün Ukraynaya nümunə olmaq istəyir ki, vaxtı işə ayırmaq lazımdır. Rüşvət hallarına yol verilməməlidir. Bu günlərdə nəqliyyat vasitələrinə mane olan müfəttişlərə qarşı ciddi addımlar atdı. Saakaşvili istəyir ki, Odessa bir nümunə olsun və bu, dəyişikliklərin sıçrayış nöqtəsi olsun. Onu da deyim ki, qubernatorla Ukrayna Daxili işlər naziri Abakov arasında münasibətlər çox gərgindir. Biri-birlərini çox tənqid edirlər. Mümkündür ki, hansısa qüvvələr Saakaşviliyə qarşı müəyyən sui-qəsd planı haqqında düşünsünlər. Ona görə də, Saakaşvilinin yanındakı mühafizəçilərə inanmaq olmaz. Ondansa, tək gəzsə, daha etibarlıdır nəinki mühafizəçi ilə. Bilmək olmaz. Onların içində Abakovun öyrətdiyi şəxslər də ola bilər. Həm də yəqin fikirləşir ki, kimsə onu hədəf götürübsə, təhlükəsizlik orqanları onu nədən qoruya bilərlər ki”.
Ayyət Əhməd
