Qafqaz Müsəlmanları İdarəsi axund Hacı Musa Qasımovu Nardaran qəsəbəsinə baş qazı təyin edib. Təyinatla bağlı açıqlama verən yeni qazı bildirib ki, o, Sabunçu rayonu ərazisində ümumilikdə 39 məscidə nəzarət edəcək.
Konkret Nardaran qəsəbəsinə gəlincə isə burada bir icma fəaliyyət göstərəcək: "Rayondakı məscidlərə axundlar təyin olunacaq. Nardarandakı 8 məscidə isə ümumi qaydada nəzarət edəcəyik. Xeyli savadlı-diplomlu yoldaşlar var. Çalışacağıq ki, onlar məscidlərdə axundluq etsinlər”. Məlumat üçün deyək ki, Bakıda ilk dəfə olaraq qazılıq institutu yaradılıb. Qəsəbədə aparılan dini islahatlarla bağlı "Şərq”ə açıqlama verən ilahiyyatçı Seyid Camal Əzimbəyli deyib ki, Nardaranda Qafqaz Müsəlmanları İdarəsi Dini Qurumlar Komitəsi ilə paralel iş aparır: "Bir müddət öncə Komitə sədri Mübariz Qurbanlının Nardaran icması ilə görüşü çox təqdirəlayiq hal idi. Artıq proseslər yoluna qoyulub. Düşünmürəm ki, Nardaranda yenidən Azərbaycanın dövlət maraqlarına zidd olan proseslər başlasın. Çünki qəsəbədə dövlətçiliyimizə, milli dəyərlərimizə bağlı olan çox dəyərli ağsaqqallar, ziyalılar var. Bildiyim qədər Nardaranın böyük əksəriyyəti bu məsələdə yekdil mövqedədir. Ümumi anlamda razılaşma əldə olunub. Eyni zamanda qəsəbəyə təyin edilən qazıya əlavə səlahiyyətlərin verilməsi də QMİ-nin Nardarandakı nəzarətini artıracaq”.
İsmayıl
