"Hansısa problemi, hətta xırda detalları böyüdüb, ümumən ölkəmizdə tolerantlığın istənilən səviyyədə olmadığını iddia edə bilmərik”.
Bunu "Sherg.az”a sosial şəbəkələrdə din pərdəsi altında anti-Azərbaycan təbliğatının aparılmasından danışarkən tanınmış şərqşünas seyid Camal Əzimbəyli deyib.
O diqqətə çatdırıb ki, bir neçə xırda məqamı əsas götürüb, ölkəmizdə dinlərarası və millətlərarası münasibətlərin dözümsüz olduğunu söyləmək əsassızdır:
"Hər hansı şəxsin dövlətin dini, mənəvi dəyərləri təbliğ etmədiyini söyləməsi şər-böhtandır. Çünki ölkədə dinlərarası, hətta təriqətlərarası münasibətlər demokratik dəyərlərlə öyünən digər ölkələrlə müqayisədə belə daha üstündür. Tolerantlıq Azərbaycan cəmiyyətində yüksək səviyyədədir.
Düşünürəm ki, bəzi məqamlarda tolerantlıqdan istifadə edərək, sosial şəbəkələrdə bilərəkdən və ya bilməyərəkdən Azərbaycan əleyhinə təbliğat aparırlar. Ölkəmizdə bəzi qüvvələrin təriqətlər arasında təfriqə salmaq istədiyi aydın görünür.
Azərbaycanda sevindirici hal odur ki, İslamda təbliğ edilən tolerantlığın, dözümlülüyün himayəçisi dövlət özüdür. Dini cameə aid olan hər kəs indiki həssas məqamda dövlətin yanında olmağa imanı ilə borcludur”.
Qeyd edək ki, sosial mediada yayılan müxtəlif status, rəy və videomüraciətlərdə Azərbaycanda dini və milli azadlıqların, insan haqlarının pozulduğu, dindarların sıxışdırıldığı, guya hakimiyyətin Dağlıq Qarabağı qaytarmaq istəmədiyi və sadəcə vaxt uzatdığı və s. bu kimi iddialar irəli sürülür.
Aysel Aslan
