Bütün dünyada sürətlə yayılan və Azərbaycan sərhədlərinə kimi də gəlib çatan "donuz qripi” istər-istəməz insanlarda təşviş yaradır. Türkiyə, İran, Rusiya, Dağıstan və Gürcüstanda bu qripə yoluxan insanlar barədə məlumatlar açıqlanır. Azərbaycandan insanların bu ölkələrdə səfər etdiklərini nəzərə alanda, onların qripə yoluxma ehtimalları da artır.
"Donuz qripi”nin Azərbaycanın bir addımlığına yaxınlaşdığı bir zamanda ölkəmizdə bu virusa yoluxanların olmaması şübhələr və suallar yaradır.
Səhiyyə Nazirliyinin mətbuat xidmətinin rəhbəri Liya Bayramova isə açıqlamasında insanların bu cür fikirləşməsi üçün heç bir əsas olmadığını deyib: "Əgər kimsə bu xəstəliyə yoluxubsa, niyə gizlətsin və ya niyə gizlədilsin. Əgər belə hal olarsa, bunu hamı biləcək. Şükür Allaha ki, bu günə qədər ölkəmizdə belə fakt olmayıb. Bununla bağlı artıq məktəblərdə, bağçalarda,
dəmiryollarında, metrolarda dezinfeksiya işlərinə başlanılıb. Ciddi nəzarət altında güclü tədbirlər görülür”.
Taun Əleyhinə Stansiyanın Xüsusi Təhlükəli Yoluxucu Xəstəliklərin Epidemiologiya şöbəsinin müdiri Rita İsmayılova bildirib ki, əvvəlki günlərlə müqayisədə onlara "donuz qripi” şübhəsi ilə daxil olan müraciətlərin sayı azalıb: "Bizə nümunələr daxil olur, həmin nümunələr kəskin respirator virus simptomlu xəstələrdən götürülüb. Amma onların həcmi artıq azalıb. Hələlik "donuz qripi”nə yoluxanlar yoxdur, nəticələr mənfidir. Yenə də qabaqlayıcı tədbirlərimiz davam edir, məktəblərdə və bağçalarda dezinfeksiya işləri aparılır. Bu işlər ciddi nəzarət altındadır”.
Səhiyyə Nazirliyinin sanitar-epidemioloji xidmət sektorunun müdiri Viktor Qasımov isə hər hansı təhlükənin qarşısını almaq üçün dezinfeksiya işlərinin aparılması ilə əlaqədar Bakı Metropoliteni və "Azərbaycan Dəmir Yolları” Qapalı Səhmdar Cəmiyyətinə müraciət etdiklərini vurğulayıb. Onun sözlərinə görə, dezinfeksiya işləri "donuz qripi” təhlükəsi ilə əlaqədar aparılacaq: "Biz qabaqlayıcı tədbirlər görürük. Gözləməməliyik ki, xəstəlik baş versin. Artıq həmin qurumlara müraciət etmişik. Onlar da bu məsələyə baxır. Çox güman ki, dezinfeksiya tədbirləri görüləcək”.
Şəymən
