"Tramvayların və trolleybusların Azərbaycanın iri şəhərlərində istifadəyə verilməsi yaxşı addım olardı”.
Bunu "Sherg.az”a Fransanın "Alstom” dəmiryol nəqliyyatı şirkətinin Bakıda tramvay xətlərinin bərpası layihəsi ilə bağlı danışarkən nəqliyyat sahəsi üzrə ekspert İlqar Hüseynli söyləyib.
O xatırladıb ki, 1996-1997-ci illərdə Bakıda bütün tramvay xətləri ləğv edildi:
"Küçə və prospektlərdə hərəkət zolaqları, tramvay relsləri sökülərək yerində lazımsız bardyorlar quruldu. Hələ o illərdən bəri ekspertlər tramvay xətlərinin ləğv edilməsinin əleyhinə idi. Tramvaylar ilk növbədə tıxac probleminin həllində effektiv nəqliyyat vasitəsidir. Həmçinin elektriklə çalışdığına görə, ekoloji cəhətdən kifayət qədər səmərəlidir”.
İlqar Hüseynlinin fikrincə, tramvay xətlərinin bərpa olunması ciddi maliyyə tələb edir:
"Əvvəldən bu xətlər saxlansaydı, indi istifadə etmək üçün köhnə infrastrukturun üzərində yeniləmələr edə bilərdik. Yenidən tramvay xətlərinin qurulması asfalt örtüyünün zədələnməsinə, prospektlərin ortasında qurulan lazımsız vasitələrin, işıq dirəklərinin sökülməsinə səbəb olacaq. Bu infrastrukturun qurulması bəlkə də illər aparacaq prosesdir. Əslində bu problem şəhərsalmanın ilk dövrlərində həll edilməli idi”.
Qeyd edək ki, adıçəkilən əcnəbi şirkət Bakıda tramvay xətlərinin bərpası layihəsinin reallaşdırılması ilə bağlı Azərbaycan tərəfinin qərarını gözləyir. Şirkətin Qərbi və Mərkəzi Asiya üzrə idarəedici direktoru Bernard Pell deyib ki, bir neçə il əvvəl Bakıda tramvay xətlərinin bərpa olunması ilə bağlı təklif irəli sürüblər: "Lakin paytaxtda Formula-1 yarışlarının keçirilməsi ilə əlaqədar planları və tramvay xəttinin profilini dəyişməli olduq”.
Aysel Aslan
