"Bakının bəzi rayonlarında suyun verilməsi bərpa olunub, amma elə yerlər var ki, hələ də su verilməyib”.
Bunu "Sherg.az”a paytaxt ərazisində mövcud olan su təchizatı problemindən danışarkən "Azərsu" ASC-nin mətbuat xidmətinin rəhbəri Anar Cəbrayıllı söyləyib.
O vurğulayıb ki, su təchizatının tam şəkildə bərpası hələlik mümkün olmayıb:
"Paytaxt ərazisində su təchizatında axşam saatların stabillik yaranacaq. Amma sistemin tam bərpa olunması sabah üçün nəzərdə tutulub.
Su təchizatında yaranmış problemin yeganə səbəbi elektrik enerjisinin dayandırılması oldu. "Azərsu" ASC-nin su təchizatını təmin etmək üçün istifadə olunun motorlarını işə salmaq üçün xüsusi generatorlar var. Amma bu qurğular xırda generatorlar olduğuna görə, Qəbələ və Ceyranbatan kimi böyük həcmli su anbarlarını işə salmaq üçün kifayət deyil. Bu su anbarlarına daha iri həcmli qurğular vacibdir”.
Qeyd edək ki, bu gün səhər saatlarından paytaxtın Yasamal, Nərimanov, Səbail, Nəsimi, Suraxanı, Sabunçu rayonlarında suyun verilişini bərpa edilib. Ancaq bu ərazilərdə suyun təzyiqi aşağıdır.
Aysel Aslan
