Fevralın 7-də Azərbaycan Respublikasının Prezidenti İlham Əliyev zəlzələnin baş verdiyi Şamaxıya gəlib. Məlumata görə, fövqəladə hallar naziri, general-polkovnik Kəmaləddin Heydərov və Şamaxı Rayon İcra Hakimiyyətinin başçısı Tahir Məmmədov dövlətimizin başçısına fevralın 5-də və 6-da təbii fəlakətin törətdiyi fəsadlar barədə yerində məlumat veriblər. Prezident İlham Əliyev zəlzələdən zərər çəkən tikililərə baxıb və sonra sakinlərlə söhbət edib.
Ölkə başçısının məlum addımını yüksək qiymətləndirən "Azəri-Türk" Qadınlar Birliyinin sədri Tənzilə Rüstəmxanlı "Sherg.az"a bildirib ki, cənab Prezidentin Şamaxıya gedərək hadisə yerinə baş çəkməsi gözlənilən idi:
"Ümumiyyətlə, Prezident belə olaylar zamanı zərər çəkmiş insanlara çox həssas yanaşır. Bir müddət öncə, şəhid ailələri,şəhid anaları və eyni zamanda gənclərlə çox səmimi görüşləri baş tutdu. Cənab prezident bu cür qayğıkeş addımları onun xalqımıza olan sevgisindən irəli gəlir.
Bütün bu diqqət və qayğıya görə, ölkə başçısına minnətdaram. Əlbəttə, bu təqdirəlayiq addımdır. Azərbaycan xalqı, ictimaiyyəti də Prezidentin səmimi, lütfkar münasibətini görür və ölkə başçısına böyük sevgi ilə yanaşır".
Qeyd edək ki, Prezident İlham Əliyev Azərbaycan Respublikasının Şamaxı, İsmayıllı və Ağsu rayonlarında baş vermiş təbii fəlakətin nəticələrinin aradan qaldırılması tədbirləri haqqında sərəncam imzalayıb. Sərəncamda qeyd edilir ki, baş vermiş zəlzələlər nəticəsində Şamaxı, İsmayıllı və Ağsu rayonlarında yaşayış evlərinə, sosial və infrastruktur obyektlərinə dəymiş ziyanın aradan qaldırılması üçün Azərbaycan Respublikasının 2019-cu il dövlət büdcəsində nəzərdə tutulmuş Azərbaycan Respublikası Prezidentinin ehtiyat fondundan Azərbaycan Respublikasının Fövqəladə Hallar Nazirliyinə ilkin olaraq 2 milyon manat ayrılsın. Maliyyə Nazirliyinə sərəncamda göstərilən məbləğdə maliyyələşməni təmin etmək, Nazirlər Kabinetinə bu sərəncamdan irəli gələn məsələləri həll etmək tapşırılır.
Ayyət Əhməd
