Qazaxıstanın dövlət orqanları, Baykonur kosmodromunu Rusiyanın icarəsindən çıxarmağı nəzərdən keçirir. "Sherg.az” "İnterfaks"a istinadən məlumat verir ki,
bu haqda Qazaxıstanın Elektronlaşdırma, Müdafiə və Aviasiya Sənayesi nazirinin müavini Marat Nurgorjin Senatın iclasında bildirib.
"Əvvəllər "Roskosmosun” rəhbərliyi ilə bu məsələləri şifahi olaraq müzakirə etdik. Kosmodromun çatışmazlıqları və mənfi cəhətləri var" - deyən nazir müavini əlavə edib ki, Baykonurun hüquqi baxımdan Rusiyadan tədricən çıxarılması nəzərdə tutulur.
Bundan əlavə, Senat Rusiya ilə Qazaxıstan arasında Baykonurun statusu ilə bağlı sazişə dəyişiklik edilməsi barədə protokol qəbul edib. Protokol 2016-cı ildə Sankt-Peterburqda tərəflər arasında imzalanmışdı. Sənədə əsasən şəhərdə maliyyə idarəsi, sərhəd xidməti birliyi və ictimai qurumlar da daxil olmaqla, Qazaxıstanın dövlət orqanlarının on əlavə bölməsinin yaradılmasını nəzərdə tutur.
Hazırda Baykonurda yalnız səkkiz Qazaxıstan hakimiyyət orqanının - prezidentin xüsusi nümayəndəsi, hüquq-mühafizə orqanlarının nümayəndəlikləri, məhkəmə və aviasiya komitəsinin bölmələri işləyir. Qalan idarələr Rusiyaya bağlıdır.
Xatırladaq ki, Baykonurda 76 mindən çox insan yaşayır. Onlardan 60 faizi Qazaxıstan vətəndaşlarıdır. Şəhər Rusiyanın bələdiyyə müəssisələri, hüquq-mühafizə orqanları və idarələri tərəfindən idarə edilir. Onu da bildirək ki, idarəetmə rəhbərləri bu günə qədər Qazaxıstan və Rusiya prezidentlərinin fərmanları ilə təyin olunur.
Anar
