"Türkiyə-Suriya sərhəddində baş verənlər Ankaranın Suriyaya hərbi müdaxiləsi üçün intensiv hazırlığın getdiyini göstərir”. Bunu Rusiya Müdafiə Nazirliyinin rəsmi nümayəndəsi İqor Konaşenkov deyib. O, Rusiyanın buna şübhə etmək üçün ciddi əsaslara malik olduğunu bildirib:
"Türkiyə Silahlı Qüvvələrinin Suriya ərazisində aktiv fəaliyyətinə gizli hazırlığın əlamətlərini getdikcə daha çox görürük”. Konaşenkovun sözlərinə görə, bir müddət öncə Rusiya Müdafiə Nazirliyi dünya ictimaiyyətinə Türkiyə artilleriya qurğularının Suriyanın Latakiya bölgəsində yaşayış məntəqələrini atəşə tutmasını əks etdirən kadrları təqdim edib: "Bizi təəccübləndirən odur ki, Pentaqon, NATO və Suriyada insan haqlarını müdafiə edən təşkilatların nümayəndələri bu hərəkətlərə reaksiya vermək əvəzinə, hələ də susurlar”. O, həmçinin xatırladıb ki, Rusiya Müdafiə Nazirliyi Yaxın Şərq regionunda kəşfiyyatı gücləndirib: "Əgər Ankarada kimsə Rusiya müşahidəçilərinin uçuşunu təxirə salmaqla nəyisə gizlətməyin mümkün olacağını düşünürsə, bu, qeyri-peşəkarlıqdır”. Məsələ ilə bağlı "Şərq”ə danışan Sülh və Münaqişələrin Həlli Mərkəzinin rəhbəri Elxan Mehdiyev Rusiya rəsmisinin iddiasını əsassız adlandırıb. Politoloq Türkiyənin Suriyaya hərbi müdaxilə edəcəyini düşünmür: "Suriyaya müdaxilə etmək üçün münbit şəraitin olduğu, beynəlxalq güclərin rəsmi Ankarını dəstəklədiyi bir zamanda Türkiyə hökuməti bunu etmədi. İndiki gərgin dönəmdə, Rusiya ilə kəskin münasibətlər fonunda Suriyaya hərbi müdaxilə mümkünsüzdür. Çünki quru qoşunlarının hərbi müdaxiləsi həm də havadan dəstəklənməlidir. Türkiyə təyyarələrinin hazırda Suriya sərhədlərini keçməsi risklidir. Çox güman ki, o zaman türk qırıcıları ruslar tərəfindən vurulacaq. Həmçinin, Türkiyədə daxili vəziyyət hər hansı ölkəyə müdaxilə etməyə adekvat deyil. Prezident Ərdoğanın da artıq belə bir fikri yoxdur. Çünki Suriyada hər şey əldən verilib. Niyə girəcək Türkiyə, bununla nə əldə edəcək ki?”. Ekspertin
sözlərinə görə, Türkiyənin Suriya ilə sərhəddinə qoşun cəmləməsi dövlətin öz təhlükəsizliyi ilə bağlıdır: "Suriyada şiddətli müharibə gedir, mərmilər Türkiyə ərazisinə düşür. Silahlı qüvvələr bütün günü sərhəddə gəzişir. Təbii ki, bunlar Ərdoğan hökumətini ciddi narahat edir”.
İsmayıl
