"Bazarlarda bahalaşmanın səbəblərindən biri də müəyyən iqtisadi siqnallar olur”.
Bunu "Sherg.az”a yumurtanın qiymətlərinin artmasının səbəblərini izah edərkən iqtisadçı- ekspert Nazim Bəydəmirli bildirib.
O vurğulayıb ki, bir müddət əvvəl enerji və yanacağın qiymətinin artırılmasından sonra zəncirvarı reaksiya baş verdi, qiymət artımı genişləndi:
"Çünki istənilən məhsulun istehsalında, istənilən xidmətin maya dəyərində enerji daşıyıcılarının rolu ən aşağı göstərici ilə 20-30 faizdir. Qiymət artımını, ərzaq məhsullarının bahalaşmasını tək mövsümi amillərlə əlaqələndirmək doğru deyil.
Hesab edirəm ki, dövlətin vəzifəsi daha çox məhsul istehsal etmək üçün iqtisadi mühiti şəffaflaşdırmaq, sahibkarlığa qarşı neqativ halların aradan qaldırılmasına nail olmaqdır. Eyni zamanda sahibkarlığa ayrılan kreditlərin faiz dərəcələrini bir qədər endirmək lazımdır. Bütün bunlar optimal qiymətlərin formalaşdırılmasına istehsalın artmasına imkan yaradar. Təəssüf ki, məmur sahibkarlığı ölkədə hələ də dominant mövqedədir.
Holdinqlərin, bu və ya digər formada məmur sahibkarlığına məxsus olan şirkətlərin qiymətlərə təsiri nəticəsində bahalaşma baş verir. İri şirkətlər qiymət artımı həyata keçirməklə izafi xərclərini istehlakçıların boynuna yıxır. İnsanlar da bundan əziyyət çəkirlər”.
Aysel Aslan
