"Paytaxtın yollarında işıqforları işləmir və bu səbəbdən təcili tibbi yardım maşınları gecikib".
Bunu "Sherg.az"a Səhiyyə Nazirliyinin Mətbuat Xidmətinin rəhbəri Pərviz Abubəkirov bildirib.
Qurum sözçüsü qeyd edib ki, tıxac yaranan hissələrdə təcili tibbi yardım avtomobillərinə yol verilmədiyinə görə, onlar müraciətlərə operativ yetişə bilməyiblər:
"Həmçinin xəstəxanaya çatdırılmalı olan xəstələr də təcili tibbi yardım maşınlarında tıxacda qalıb. Buna görə, əhaliyə sizin sayt vasitəsilə müraciət edirik. Bu cür fövqəladə hallarda, yollarda tıxac yarandıqda mümkün qədər təcili tibbi yardım maşınlarına yol verin. Bir vətəndaş olaraq düşünsək, ola bilər, həmin təcili yardım avtomobilləri sizin yaxınlarınızı xilas etməyə yollanıb.
Tıxacda qalan təcili tibbi yardım maşınlarının metro stansiyalarına gecikməsi nəticəsində ağır vəziyyətə düşən, dünyasını dəyişən xəstələr də ola bilərdi. Amma bütün bunlara rəğmən, metroda qalan vətəndaşların, polislərin fədakarlıq göstərməsi nəticəsində, yaşlılar, qadınlar və uşaqlar, hamilə qadınlar, tibbi problemi olan şəxslər metro tunellərindən çıxarılıb. Həkimlərin işinə yardım edənlər də olub. Yaranmış vəziyyət nəticəsində ölüm halı baş verməyib”.
Nazirliyin sözçüsü onu da əlavə edib ki, bu gün yerüstü nəqliyyatda sərnişin daşınmasında problemlər yaşanmadığından xəstəxanalara müraciət olunmayıb:
"Metro fəaliyyətini müvəqqəti dayandırsa da, marşrut sistemi intensiv fəaliyyət göstərir. Bu gün hələlik avtobuslarda və küçədə halı pisləşən, təcili tibbi yardım briqadasına, xəstəxanalara müraciət edən olmayıb”.
Aysel Aslan
