"Sərnişindaşıma qaydalarına görə, sərnişinlərin təhlükəsizliyini təmin etmək üçün sərnişindaşıma avtobusları içərisində sərnişin olarsa, yanacaqdoldurma məntəqələrinə daxil olmamalıdır”.
Bunu Sherg.az-a sürücülərin sərnişin dolu avtobusla yanacaqdoldurma məntəqəsinə daxil olmağına münasibət bildirərkən Azərbaycan Texniki Universitetinin Avtomobil daşımaları və yol hərəkətinin təşkili kafedrasının dosenti, nəqliyyat eksperti Fərhad Eyyubov deyib.
O bildirib ki, müəyyən olunmuş qaydalarda birmənalı şəkildə sürücülərə buna icazə verilmir:
"Bu, hər yerdə göstərilir və mətbuatda da dəfələrlə ifadə olunub. Səmimi deyək ki, əksər sürücülər buna əməl edir. Bəzən ola bilər avtobusun yanacağı çatmır məcbur qalıb, bunu edir. Amma bu zaman "dispetçer"lə əlaqə saxlamalı, marşrutun xətdən kənarlaşdırılmasını, yanacaqla təmin olunmasını istəməlidir. Sonra öz vaxtında marşruta daxil ola bilər. Sərnişinlərlə birlikdə yanacaqdoldurma məntəqəsinə girmək qəti olmaz.
Bu, həm ümumi nəqliyyat nizamnaməsində, həm də sərnişindaşıma qaydalarında ifadə olunub. Bəzi səhlənkar sürücülər buna yol verir. Bakı Nəqliyyat Agentliyi isə belə halların qarşısını almağa çalışır. Həmin sürücülərlə əvvəl iş aparılmalı, sonra isə qanunu pozan sürücülər cəzalandırılmalıdır. Elə vəziyyətlər olur, sürücülərin təqsiri olmayan hallardan baş verir. Amma birbaşa sürücünün subyektiv təqsiri ucbatından baş verən vəziyyətlərə yol verilməməlidir”.
Aysel Aslan
