"Şəhid bulağına sayğacın qoyulmasını şəhidlərimizə təhqir hesab edirəm”.
Bunu Sherg.az-a Mingəçevirdə şəhidin adını daşıyan bulağa sayğac quraşdırılmasına münasibət bildirərkən "Qarabağ qaziləri” İctimai Birliyinin sədri, Qarabağ qazisi Etimad Əsədov deyib.
O bildirib ki, bir valideyn öz övladını vətən, onun ərazi bütövlüyü üçün qurban verir, şəhidlik zirvəsinə ucaldır, sonra isə onun adına tikilmiş bulaqdan su pulu alınır:
"Bu, yolverilməzdir. Azərbaycan məmurları adına biabırçılıq və rüsvayçılıqdır. Şəhidimizə verilən dəyər budursa, çoxdan torpaqlarımız ermənilərə verilib. Yalançı danışıqlar sadəcə zaman udmaqdır ki, xalqda nəsillər dəyişsin və insanlar həmin torpaqları unutsun. Bununla torpaqlar de-fakto ermənilərdə olduğu halda de-yure də rəsmiləşdirilsin. Azərbaycan məmurlarının ortaya qoyduğu mövqe budur. Mingəçevirdəki şəhid bulağından, şəhidin xanımından və atasından suya görə vəsait tələb edilməsi də bunu sübut edir".
Qarabağ döyüşçüsü saytımız vasitəsilə Azərbaycan hökumətinə, məmurlara və parlamentə müraciət edib:
"2014-cü il Konstitusiya Məhkəməsinin qətnaməsinə görə, hər bir valideynə dövlət 11 min manat qanpulu ödəməlidir. Konstitusiya Məhkəməsi qətnaməsinin kağız üzərində qalması ayıbdır. Parlament bu pulun verilmə qaydasını qısa zamanda müəyyənləşdirməli, dövlət isə pulu ödəməlidir. Əvvəl dövlət şəhidin qanpulunu versin, onun ailəsi də su pulunu ödəyəcək. Necə olur ki, regionun güclü , qüdrətli dövləti Azərbaycan şəhidinin qanpulunu verə bilmir. Şəhidin qanpulunu verə bilməyən dövlət necə regionun qüdrətli ölkəsi olduğunu iddia edir? Bu, biabırçılıq və şəhidlərimizə böyük hörmətsizlikdir. Son hadisə isə Lələ təpədə ordumuzun uğuruna dırnaqarası baxış, Azərbaycan xalqına, bütün şəhid ailələrinə təhdiddir. Ayıb olsun, bunu tələb edən məmura!”
Qeyd edək ki, məhəllə sakinlərinin təşəbbüsü ilə çəkilən şəhid Şaiq Mustafayevin xatirəsinə çəkilən bulağa isə 6 ay əvvəl sayğac quraşdırılıb. Şəhidin həyat yoldaşı deyir ki, bulaqdan daim suyun gəlməsi üçün hər ay 5 manat ödəyir.
Videoyaya bu linkdən baxa bilərsiniz:
Aysel Aslan
